13 верасня ў музеі кнігі прайшлі ўнікальныя заняткі для незвычайнага наведвальніка.
У бібліятэцы пабывала медзведзяня Топа з культавай дзіцячай перадачы “Калыханка”.
Топа з’яўляецца не толькі любімым героем маленькіх гледачоў, але яшчэ і тэлезоркай. Сёлета лялечны персанаж дзіцячай праграмы па выніках інтэрнэт-галасавання на сайце тэлеканала “Сталічнае тэлебачанне”, арганізаванага да XII Нацыянальнага тэлевізійнага конкурсу “Тэлевяршыня”, набраў большасць галасоў. А акцёр Уладзімір Варанкоў, які агучвае медзведзяня і якога гледачы назвалі лепшым вядучым, атрымаў “Прыз глядацкіх сімпатый”.
Праграма “Калыханка” апавядае маленькім гледачам цікавыя гісторыі і дапамагае адкрываць вялікі свет, аб’ядноўвае і наладжвае на прыемную вячэрнюю тэлехвалю ўсю сям’ю.
На музейных занятках ў Нацыянальнай бібліятэцы медзведзяня адправілася ў падарожжа ў таямнічы свет гісторыі кнігі і пазнаёмілася з багатай рукапіснай і друкаванай кніжнай культурай Беларусі. Топа даведаўся пра матэрыялы, формы, асаблівасці афармлення рукапіснай кнігі і працы перапісчыка, а таксама змог сам пабываць у ролі пісца. Медзведзяня атрымала звесткі пра пачатак кнігадрукавання і дзейнасць першадрукара Францыска Скарыны, а таксама зрабіла паштоўку на памяць, прысвечаную 500-годдзю беларускага кнігадрукавання.
І самае важнае – заняткі ўбачаць маленькія гледачы ў кастрычніку ў эфіры тэлеканала “Беларусь-3”.