26–28 верасня ў Астане (Рэспубліка Казахстан) прайшоў Форум бібліятэкараў краін СНД "Бібліятэкі Садружнасці: інтэграцыя, інавацыя і доступ для ўсіх".
У форуме ўзялі ўдзел прадстаўнікі міністэрстваў культуры краін СНД, кіраўнікі нацыянальных бібліятэк і прафесійных асацыяцый, прадстаўнікі ўстаноў адукацыі, якія забяспечваюць падрыхтоўку бібліятэчных кадраў.
Ад Рэспублікі Беларусь у рабоце форуму прыняла ўдзел дэлегацыя ў наступным складзе: Матульскі Р.С., дырэктар Нацыянальнай бібліятэкі Беларусі; Далгаполава А.Е., першы намеснік дырэктара Нацыянальнай бібліятэкі Беларусі; Задзяркоўская Н.І., галоўны спецыяліст упраўлення ўстаноў культуры і народнай творчасці Міністэрства культуры Рэспублікі Беларусь; Яцэвіч Н.А., дэкан факультэта інфармацыйна-дакументных камунікацый Беларускага дзяржаўнага ўніверсітэта культуры і мастацтваў.
У рамках форуму абмяркоўваліся найважнейшыя для развіцця бібліятэчнай справы пытанні – прыярытэтныя кірункі дзяржаўнай палітыкі ў краінах СНД, стратэгічныя пытанні развіцця бібліятэк ва ўмовах інфармацыйнага грамадства, новыя падыходы да падрыхтоўкі кадраў, пытанні развіцця міжбібліятэчнага супрацоўніцтва.
Прадстаўнікі беларускай дэлегацыі ўзялі ўдзел у рабоце пленарнага і секцыйных пасяджэнняў і выступілі з дакладамі "Бібліятэка ў эпоху інфармацыйных тэхналогій: парадыгма развіцця" (Матульскі Р.С.), "Роля Беларускай бібліятэчнай асацыяцыі ў кансалідацыі прафесійнай супольнасці" (Далгаполава А.Е.), "Рэалізацыя дзяржаўнай палітыкі ў галіне бібліятэчнай справы ў Рэспубліцы Беларусь" (Задзяркоўская Н.І.), "Шматузроўневая сістэма падрыхтоўкі бібліятэчных кадраў у Рэспубліцы Беларусь" (Яцэвіч М.А.).
Дэлегацыя прыняла актыўны ўдзел у рабоце дыскусійных пляцовак і іншых мерапрыемствах форуму. У рамках пасяджэння круглага стала "Калі мы разам: новая роля бібліятэчных асацыяцый ва ўмовах інфармацыйнага грамадства" быў падпісаны Мемарандум аб супрацоўніцтве па ўзмацненні бібліятэчных асацыяцый СНД.
Чытайце таксама:
Форум библиотекарей стран СНГ