8 лютага ў Нацыянальнай бібліятэцы Беларусі адбудзецца пасяджэнне круглага стала “Бібліятэкі Беларусі і фарміраванне інфармацыйнай культуры навучэнцаў і студэнтаў”.
Пасяджэнне пройдзе ў рамках XХ Мінскай міжнароднай кніжнай выстаўкі-кірмашу “Кнігі Беларусі – 2013”.
Часта нават сур’ёзныя спецыяллісты ў сваёй галіне не падазраюць, якія шырокія магчымасці інфармацыйнага абслугоўвання ім гатовы прадаставіць сучасныя бібліятэкі. У выніку інфармацыйны рэсурс застаецца мала запатрабаваным, а інфармацыйныя запыты спажыўца – незадаволенымі.
Наяўнасць навыкаў і ўменняў арыентавацца ў інфармацыйнай прасторы з’яўляецца залогам паспяховай самарэалізацыі ва ўсіх сферах жыццядзейнасці чалавека. Уваходжанне чалавецтва ў эпоху інфармацыйнага грамадства паставіла перад бібліятэкамі і ўстановамі адукацыі задачу падрыхтаваць падрастаючае пакаленне да жыцця ва ўмовах нарастальнай інфарматызацыі грамадства. Навучыць дзяцей і моладзь самастойна дзейнічаць у электронным асяроддзі, эфектыўна выкарыстоўваць яго магчымасці і абараняцца ад негатыўных уздзеянняў інфармацыі – задача першаступеннай важнасці.
Пад час работы круглага стала будзе абагульнены вопыт інфармацыйных і адукацыйных устаноў па фарміраванні інфармацыйнай культуры навучэнцаў і студэнтаў; разгледжаны пытанні выпрацоўкі стратэгіі міжведамаснага ўзаемадзеяння і сацыяльнага партнёрства.
Арганізатарамі мерапрыемства з’яўляюцца Міністэрства культуры Рэспублікі Беларусь і Нацыянальная бібліятэка Беларусі.
У рабоце круглага стала возьмуць удзел прадстаўнікі Міністэрства культуры і Міністэрства адукацыі, Мінскага абласнога інстытута развіцця адукацыі, Нацыянальнага інстытута адукацыі, кіраўнікі і спецыялісты бібліятэк.
