20 сакавіка дырэктар Нацыянальнай бібліятэкі Беларусі Раман Матульскі ў рамках дабрачыннай акцыі “Чытанне – прастора інфармацыі і ведаў” перадаў у фонды бібліятэк Аршанскай цэнтралізаванай бібліятэчнай сістэмы 275 экзэмпляраў мастацкай, энцыклапедычнай, даведачнай, навукова-папулярнай, вучэбнай і іншай літаратуры.
На сённяшні дзень Аршанская цэнтралізаваная бібліятэчная сістэма ўключае 36 бібліятэк, у тым ліку 23 размешчаны ў сельскай мясцовасці. Практычна кожны трэці жыхар горада Оршы і Аршанскага раёна карыстаецца паслугамі публічных бібліятэк.
Фонды бібліятэк Аршанскага раёна захоўваюць каля 730 тыс. экзэмпляраў рознай літаратуры. За 2018 год колькасць новых паступленняў у бібліятэкі рэгіёну склала 16,5 тыс. экзэмпляраў. Гэтай колькасці відавочна не дастаткова для якаснага абнаўлення фондаў.
У адпаведнасці з нарматывамі Міжнароднай федэрацыі бібліятэчных асацыяцый і ўстаноў (IFLA) фонд публічнай бібліятэкі павінен цалкам абнаўляцца адзін раз у 10 гадоў.
Калі папаўненне фондаў бібліятэк Аршанскага раёна і ў далейшым будзе адбывацца тымі ж тэмпамі, то яго поўнага абнаўлення можна чакаць толькі праз 40–45 гадоў. Таму выданні, перададзеныя ў рамках акцыі “Чытанне – прастора інфармацыі і ведаў”, стануць своеасаблівым укладам усіх яе ўдзельнікаў у справу абнаўлення фондаў бібліятэк.
Нацыянальная бібліятэка Беларусі выказвае падзяку ўсім, хто не застаўся абыякавым і далучыўся да акцыі, перадаўшы літаратуру для папаўнення фондаў бібліятэк краіны.
Дабрачынная акцыя працягваецца. Далучайцеся!
Кантакты для ўдзелу ў акцыі:
Пераверзева Юлія Аляксандраўна, заг. аддзела камплектавання фондаў,
Жукоўская Марыяна Вітальеўна, заг. сектара ўнутрырэспубліканскага дакументаабмену і пераразмеркавання.
Адрас: 220114, г. Мінск, пр. Незалежнасці, 116.
Тэлефоны: (8 017) 293 25 20, 293 25 83.
E-mail: pereverzeva@nlb.by, jukovskaya@nlb.by
Матэрыял прадастаўлены навукова-даследчым аддзелам бібліятэказнаўства.
