3–4 верасня ў рамках Дня беларускага пісьменства ў Рагачове адбудзецца “Фестываль кнігі і прэсы” – імправізаваны гарадок, дзе будзе шырока прадстаўлена гісторыя і сучаснасць беларускай кнігі.
На дзіцячай пляцоўцы фестывалю сваю праграму “Пазітыў ад Скарыны” для жыхароў і гасцей свята прадставіць Нацыянальная бібліятэка Беларусі.
Дэвіз праграмы: “Ад каго пайшла беларуская друкаваная кніга?” – “Ад Скарыны!”
Постаць беларускага першадрукара стане цэнтральнай у святочнай праграме. Чаму праграма будзе прысвечана менавіта Францыску Скарыне? Адказаў на гэтае пытанне некалькі.
Па-першае, у 2017 годзе Беларусь чакае значная падзея – 500-годдзе беларускага кнігадрукавання. Праграма адрасавана тым, хто жадае быць падрыхтаваным да важнага юбілею і ісці ў нагу з часам!
Па-другое, Скарына з’яўляецца адной з самых яркіх постацей беларускай культуры, асобай надзвычай адоранай: ён быў друкаром, вучоным, філосафам, тэолагам, перакладчыкам, пісьменнікам, батанікам і лекарам.
Па-трэцяе, Скарына быў, несумнеўна, чалавекам, поўным аптымізму, наватарства, жыццялюбства, энергіі і пазітыву! Спазнаваць Скарыну – цікавая і нянудная справа.
Праграма будзе ўключаць заняткі для дзяцей і іх бацькоў, якія праводзяцца ў даступнай і займальнай форме, напоўненая творчымі заданнямі, гульнямі і добрым настроем.
Месца правядзення:
г. Рагачоў, Фэстываль кнігі і прэсы, дзіцячая пляцоўка.
Час правядзення:
3 верасня: 13.00–14.00, 15.00–16.00, 17.00–18.00.
4 верасня: 10.00–11.00, 17.00–18.00.