5–6 чэрвеня дырэктар Нацыянальнай бібліятэкі Беларусі Раман Матульскі прыняў удзел у рабоце X Міжнароднага IT-форуму ў горадзе Ханты-Мансійску (Цюменская вобласць, Расійская Федэрацыя).
Міжнародны IT-форум – эфектыўная дыскусійная пляцоўка, на якой разглядаюцца актуальныя напрамкі развіцця інфармацыйна-камунікацыйных тэхналогій і адбываецца пошук інструментаў для папулярызацыі новых тэхналагічных трэндаў. Традыцыйна ў ім бяруць удзел краіны БРІКС (Бразілія, Расія, Індыя, Кітай, ПАР) і ШАС (Шанхайская арганізацыя супрацоўніцтва).
5 чэрвеня ў рамках рабочага візіту Раман Матульскі наведаў Дзяржаўную бібліятэку Югры, дзе правёў для калег прэзентацыю міжнароднага выдавецкага праекта па ўзнаўленні кніжнай спадчыны Францыска Скарыны, рэалізаванага сумесна з Банкам БелВЭБ, пазнаёміў іх з гісторыяй “беларускага дыямента”, яго архітэктурнымі асаблівасцямі і інфармацыйнымі рэсурсамі. Таксама Раман Сцяпанавіч падзяліўся планамі на бягучы год, распавёўшы аб новым, не менш значным праекце бібліятэкі – узнаўленні ў выглядзе факсіміле першага Буквара, 400-гадовы юбілей якога беларусы адзначаюць у 2018 годзе.
Сёння, 6 чэрвеня, у рамках IT-форуму адбыўся круглы стол “Стратэгічныя напрамкі выкарыстання новых інфармацыйных тэхналогій у культуры”. Раман Матульскі выступіў з дакладам “Дзейнасць Нацыянальнай бібліятэкі Беларусі па захаванні гісторыка-культурнай спадчыны пры дапамозе лічбавых тэхналогій” і падпісаў Пагадненне аб супрацоўніцтве паміж Дзяржаўнай бібліятэкай Югры і Нацыянальнай бібліятэкай Беларусі.
