16 чэрвеня да 10-годдзя новага будынка ў Нацыянальнай бібліятэцы прайшоў вясёлы і пазнавальны квэст “Бібліядэсант”.
Усяго ў гульні прыняло ўдзел восем каманд па пяць чалавек у кожнай. Перад гульцамі стаяла няпростая задача – здабыць ключы ад таемных дзвярэй і пракрасціся ў самае сэрца бібліятэкі. На шляху да перамогі ўдзельнікаў чакалі складаныя выпрабаванні: загадкі музея кнігі, таямніцы кальцавых бібліятэчных калідораў, інтэлектуальныя крыжаванкі і шмат нестандартных задач.
З вялікім энтузіязмам і рызыкай удзельнікі змагаліся за першынство ў квэсце, бо час быў не на іх баку – заданняў шмат, а час абмежаваны. Таму каманды-сапернікі ў асноўным перамяшчаліся бягом, уважліва ўзіраючыся ва ўсё, што іх акружае. А гэта незлічонае мноства кніг, карцін, габеленаў і іншых незвычайных прадметаў…
У выніку сумленнага і годнага спаборнічання пераможцамі “Бібліядэсанту” стала каманда ў складзе Шарашэўскай Анастасіі, Додалевай Ірыны, Курацевай Юліі, Курацева Дзяніса і Сапегі Элы. Падарункам для самых кемлівых стаў святочны торт з малюнкам Нацыянальнай бібліятэкі і вандраванне ў самае сэрца “дыямента” – кнігасховішча. Экскурсію для ўдзельнікаў-пераможцаў правяла намеснік дырэктара па інфармацыйных рэсурсах Таццяна Кузьмініч.
Астатнія гульцы квэсту атрымалі ў якасці ўзнагароды сертыфікаты ўдзельнікаў “Бібліядэсанту” і памятныя сувеніры – сімвалічныя ключы ад скарбніцы ведаў.
Віншуем! А таксама дзякуем усім удзельнікам гульні за пазітыўны настрой і жаданне правесці гэты знамянальны дзень – 10-годдзе новага будынка бібліятэкі – разам з намі!
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
 |
