Канферэнцыя, заснаваная ў гонар літаратуразнаўца, бібліёграфа, кнігазнаўца, гісторыка літаратуры П.Н. Беркава (1896–1969), праходзіла ў музеі “Замкавы комплекс «Мір»” і Цэнтральнай навуковай бібліятэцы імя Якуба Коласа Нацыянальнай акадэміі навук Беларусі.

Арганізатарамі канферэнцыі з’яўляліся Нацыянальная акадэмія навук Беларусі, Цэнтральная навуковая бібліятэка імя Я. Коласа НАН Беларусі, музей “Замкавы комплекс «Мір»”, Расійская акадэмія навук, Цэнтр даследаванняў кніжнай культуры ФДБУ навукі НДЦ “Наука”, навуковы савет Расійскай акадэміі навук “Гісторыя сусветнай культуры”.

Міжнародная канферэнцыя сабрала зацікаўленых вучоных з Беларусі, Літвы, Польшчы, Расіі, Узбекістана і Украіны. На працягу двух дзён прайшлі пленарнае пасяджэнне і шэсць секцый. У рамках канферэнцыі былі прэзентаваны выстаўкі “Кнігі эпохі Мікалая Радзівіла Чорнага з фондаў Цэнтральнай навуковай бібліятэкі імя Я. Коласа НАН Беларусі” і “Калекцыя кніг XV Міжнароднага з’езда славістаў у Беларусі, прынесеная ў дар Цэнтральнай навуковай бібліятэцы імя Я. Коласа НАН Беларусі”.

У канферэнцыі з дакладамі прынялі ўдзел спецыялісты Нацыянальнай бібліятэкі Беларусі: намеснік дырэктара Аляксандр Суша (“Кніжная спадчына Беларусі: на шляху спазнання”), загадчыца навукова-даследчага аддзела кнігазнаўства Галіна Кірэева (“Запісы на кнігах кірылічнага друку XVI – першай чвэрці XVII ст. (па фондах Нацыянальнай бібліятэкі Беларусі)”), загадчыца сектара навукова-праектнай работы Таццяна Сапега (“Кніжны збор Нясвіжскай ардынацыі Радзівілаў у фондзе Нацыянальнай бібліятэкі Беларусі: гісторыя, актуаліі і перспектывы даследавання”), галоўны бібліёграф навукова-даследчага аддзела кнігазнаўства Таццяна Карнілава (“Беларускія кірылічныя выданні: ды пытання аб тэрміналогіі”), бібліёграф таго ж аддзела Людміла Сільнова (“Часопіс «Рускі філалагічны веснік» у біяграфіі і асабістай бібліятэцы акадэміка Я.Ф. Карскага”).

Беркаўскія чытанні

Інфармацыйныя рэсурсы

Паслугі