C 5 по 10 ліпеня супрацоўнікі бібліятэкі пабывалі з прафесійным візітам у Лондане.
Мэтай паездкі Ірыны Градоўкінай, загадчыцы навукова-даследчага аддзела бібліяграфіі, і Таццяны Карнілавай, галоўнага бібліёграфа навукова-даследчага аддзела кнігазнаўства, было вывучэнне беларускіх бібліятэчных калекцый, выяўленне інфармацыі пра беларускія нацыянальныя дакументы, якія захоўваюцца ў брытанскіх бібліятэках, абмен вопытам, умацаванне і пашырэнне прафесійных кантактаў.
Бібліятэкары наведалі Брытанскую бібліятэку і Беларускую бібліятэку і музей імя Францыска Скарыны, дзе была магчымасць папрацаваць з даведачным апаратам і фондамі бібліятэк (у тым ліку са старадрукаванымі і рэдкімі выданнямі), наладзіць кантакты з супрацоўнікамі, пачуць новую і карысную інфармацыю, пабываць на розных мерапрыемствах.
Матэрыялы, сабраныя падчас паездкі, знойдуць практычнае прымяненне ў далейшай працы, у прыватнасці, для інфармацыйнага напаўнення электроннага інфармацыйнага рэсурсу “Нацыянальная бібліяграфія Беларусі”, што ў выніку будзе спрыяць паўнавартаснаму прадстаўленню дакументнай спадчыны Беларусі ў сусветнай культурнай прасторы.
Візіт у Вялікабрытанію адбыўся пры падтрымцы праекта MOST (Mobility Scheme for Targeted People-to-People-Contacts / Праграма мабільнасці для мэтанакіраваных міжасобасных кантактаў).