12–13 лістапада ў Мінску адбылося галоўнае эканамічнае мерапрыемства года – Беларускі інвестыцыйна-эканамічны форум.
Мерапрыемства праходзіла ў Нацыянальнай бібліятэцы Беларусі паралельна з шостым пленарным пасяджэннем Кансультатыўнага савета па замежных інвестыцыях пры Савеце Міністраў Рэспублікі Беларусь пад старшынствам прэм’ер-міністра краіны Сяргея Сідорскага.
Форум праводзіўся пры падтрымцы ўрада Рэспублікі Беларусь з мэтай прэзентацыі інвестыцыйнага патэнцыялу рэспублікі, умацавання станоўчага іміджу Беларусі як надзейнага дзелавога партнёра, наладжвання прамых кантактаў беларускіх арганізацый з замежнымі інвестарамі. Колькасць удзельнікаў форуму склала каля 800 чалавек, палова з якіх – прадстаўнікі замежных кампаній.
Удзельнікам форуму была прадастаўлена магчымасць адкрытай дыскусіі з прадстаўнікамі ўрада на тэмы далейшага развіцця Беларусі і перспектыў яе ўваходжання ў трыццатку краін з найлепшым бізнес-кліматам. Таксама яны змаглі пазнаёміцца з прэзентацыямі інвестыцыйных праектаў беларускіх арганізацый.
Па выніках форуму падпісаны шэраг праектаў мемарандумаў і пагадненняў.