28 ліпеня ў рамках святкавання 100-гадовага юбілею Нацыянальнай бібліятэкі Беларусі і рэалізацыі міжнароднага праекта “Беларусь сёння” адбылася ўрачыстая цырымонія перадачы кніг Зале ведаў Цэнтра народнай дыпламатыі Шанхайскай арганізацыі супрацоўніцтва ва Узбекістане.
У мерапрыемстве прынялі ўдзел саветнік Пасольства Рэспублікі Узбекістан у Рэспубліцы Беларусь Рахматула Назараў, генеральны дырэктар Нацыянальнай бібліятэкі Беларусі Аксана Кніжнікава, студэнты з Узбекістана, якія навучаюцца ў нашай краіне, творчая інтэлігенцыя, прадстаўнікі сродкаў масавай інфармацыі і супрацоўнікі бібліятэкі.
Кіраўніку ўзбекскай дэлегацыі быў уручаны сертыфікат аб перадачы ў дар калекцыі беларускіх выданняў у рамках міжнароднага праекта “Беларусь сёння”, які рэалізуе Нацыянальная бібліятэка Беларусі сумесна з Міністэрствам культуры Рэспублікі Беларусь з 2010 года. У збор увайшло каля 100 лепшых літаратурна-мастацкіх, навуковых, навукова-папулярных выданняў, энцыклапедыі, даведнікі і фотаальбомы нашай краіны. Узбекскаму чытачу калекцыя кніг прадставіць Беларусь ва ўсёй яе разнастайнасці: шматвяковая гісторыя, сучаснае жыццё, культурныя дасягненні, багатыя нацыянальныя традыцыі.
Прыемным сюрпрызам стаў зваротны падарунак Пасольства Рэспублікі Узбекістан. Фонды Нацыянальнай бібліятэкі Беларусі папоўніла калекцыя з 24 плакатаў дзеячаў культуры Узбекістана. Сярод іх – Абдула Арыпаў, Алішэр Наваі, Зульфія, Хамід Алімджан і іншыя. Таксама чытачам будзе даступны збор з 50-ці выданняў мастацкай прозы і паэзіі класікаў Узбекістана, якія раскрываюць традыцыі, лад жыцця і побыт узбекскага народа. Большасць кніг прадстаўлена на узбекскай мове.
Матэрыял пададзены аддзелам сувязей з грамадскасцю.