14 мая ў рамках візіту ў Рэспубліку Беларусь прэзідэнта Сацыялістычнай Рэспублікі В’етнам Нгуен Мінь Чыета ў Нацыянальнай бібліятэцы Беларусі адбыўся беларуска-в’етнамскі бізнес-форум.
Арганізатарамі мерапрыемства выступілі Беларуская гандлёва-прамысловая палата, Міністэрства замежных спраў Рэспублікі Беларусь, Пасольства Сацыялістычнай Рэспублікі В’етнам у Рэспубліцы Беларусь.
З прывітальным словам да ўдзельнікаў форума выступіў прэзідэнт Сацыялістычнай Рэспублікі В’етнам Нгуен Мінь Чыет.
Асноўныя мэты правядзення форума – развіццё і ўмацаванне дзелавых адносін з в’етнамскімі інвестарамі, пошук дзелавых партнёраў сярод в’етнамскіх бізнесменаў, абмеркаванне праектаў супрацоўніцтва.
Падчас мерапрыемства адбылося падпісанне шэрага двухбаковых дагавораў і кантрактаў, прайшлі перамовы членаў дзелавой часткі в’етнамскай дэлегацыі з прадстаўнікамі беларускіх прадпрыемстваў і арганізацый.
Прэзідэнта Нгуен Мінь Чыета вітаў дырэктар Нацыянальнай бібліятэкі Беларусі Р.С. Матульскі. Падчас агляднай экскурсіі па Нацыянальнай бібліятэцы прэзідэнт азнаёміўся з работай бібліятэкі, архітэктурна-канструкцыйнымі асаблівасцямі яе будынка, мастацкім афармленнем інтэр’ераў.
У музеі кнігі ўвазе госця была прадстаўлена калекцыя рарытэтных выданняў з фондаў Нацыянальнай бібліятэкі Беларусі, пасля чаго прэзідэнт Нгуен Мінь Чыет пакінуў памятны запіс у Кнізе ганаровых гасцей.
 |
 |
 |
 |
 |
 |
