У лістападзе ў Вільні, сталіцы Літоўскай Рэспублікі, прайшоў комплекс мерапрыемстваў, прысвечаных 525-годдзю беларускага першадрукара Францыска Скарыны.
Афіцыйная цырымонія пачалася з ускладання кветак да мемарыяльнай дошкі Францыска Скарыны на Ратушнай плошчы ў Вільні, на тым месцы, дзе, як мяркуецца, і знаходзілася друкарня першадрукара.
Удзел у цырымоніі прынялі прадстаўнікі беларускай дыяспары ў Вільні, кіраўніцтва пасольства Беларусі ў Літве, віленскай мэрыі, нацыянальных бібліятэк Беларусі і Літвы і многія зацікаўленыя.
Важным мерапрыемствам сталі прэзентацыя і перадача ў дар галоўным бібліятэкам Літоўскай Рэспублікі (Нацыянальнай бібліятэцы Літвы імя М. Мажвідаса, Бібліятэцы імя Урублеўскіх Літоўскай акадэміі навук і Бібліятэцы Віленскага ўніверсітэта), а таксама Віленскай беларускай гімназіі імя Ф. Скарыны факсімільнага ўзнаўлення кніжнай спадчыны Францыска Скарыны. У межах прэзентацыі былі абмеркаваны сумесныя дзеянні бібліятэк Літвы і Беларусі па падрыхтоўцы да святкавання 500-годдзя беларускага кнігадрукавання ў 2017 г.
Падчас прэзентацыі адбылася цырымонія падпісання дамовы аб супрацоўніцтве паміж Нацыянальнай бібліятэкай Беларусі і Бібліятэкай імя Урублеўскіх Літоўскай акадэміі навук. Заключэнне дагавора будзе садзейнічаць больш цеснаму і ўзаемавыгаднаму супрацоўніцтву нашых краін у галіне бібліятэчнай справы.
Таксама 20 і 21 лістапада праходзіла міжнародная навуковая канферэнцыя “Кніжная традыцыя Вялікага Княства Літоўскага”, у рамках якой выступілі эксперты з Беларусі і Літвы па пытаннях сумеснага вывучэння кніжнай спадчыны нашых краін. Арганізатарамі канферэнцыі выступілі Беларускае культурнае таварыства ў Літве “Сябрына”, Літоўская асацыяцыя беларусістаў, Інстытут літоўскай мовы, Пасольства Рэспублікі Беларусь у Літоўскай Рэспубліцы і Нацыянальная бібліятэка Беларусі.
Правядзенне сумесных канферэнцый і іншых навуковых мерапрыемстваў дазваляе з’яднаць навуковыя сілы для вывучэння агульнай культурнай спадчыны Беларусі і Літвы, паслужаць умацаванню міжнародных культурных сувязей.
Вельмі сімвалічна, што ўсё гэтыя мерапрыемствы прайшлі ў двухбаковым беларуска-літоўскім фармаце, паколькі дзейнасць Скарыны і многіх яго паслядоўнікаў лучыць нашыя культуры. Францыск Скарына, які нарадзіўся ў Полацку, вучыўся ў Кракаве і Падуі, друкаваў свае кнігі ў Празе і Вільні, злучыў гэтая гарады непарыўнай сувяззю.
|
|
|
|
|
|
|
|
|
