Міжнародны маладзёжны лагер “Бе-La-Русь” больш за два дзесяцігоддзі праходзіць у канцы ліпеня на стыку граніц Беларусі, Латвіі і Расіі.
Ідэйным натхняльнікам праекта выступаюць грамадскае аб'яднанне “Беларускі рэспубліканскі саюз моладзі”, грамадскае аб'яднанне “Саюз за прагрэс моладзі Латвіі” і агульнарасійская грамадская арганізацыя “Расійскі саюз моладзі”.
У назве лагера, якая складаецца з першых складоў назваў трох краін, заключана ідэя адзінства моладзі памежных дзяржаў. Кожны год яго “гаспадыняй” становіцца адна з трох маладзёжных арганізацый – заснавальніц ММЛ “Бе-La-Русь”.
Палатачны лагер ужо многія гады размяшчаецца на гасціннай паляне, побач з Курганам Дружбы ў Верхнядзвінскім раёне Віцебскай вобласці, насыпаным у 1959 годзе ў памяць пра баявую садружнасць партызан Беларусі, Расіі і Латвіі.
Міжнародны маладзёжны лагер “Бе-La-Русь” па традыцыі збірае самых ініцыятыўных, спартыўных і творчых юнакоў і дзяўчат, якіх не палохаюць адлегласці, межы, спякота і нават праліўны дождж. Сёлета ў ім пабывалі члены пярвічнай арганізацыі БРСМ Нацыянальнай бібліятэкі Беларусі Вішнеўская Аляксандра і Баўтрук Алена.
Кожны год арганізатары вызначаюць тэму лагера, у рамках якой праводзяцца спаборніцтвы ў розных творчых і спартыўных конкурсах.
Любая вялікая і сур'ёзная справа мае свае традыцыі, якія ўмацоўваюцца і памнажаюцца. Самыя запамінальныя і вясёлыя – пасвячэнне навічкоў (або “вадохрышча”) дубовымі галінкамі, экстравагантныя калядкі латышскіх сяброў, развітальны “агульны круг” і яшчэ многае іншае.
“Бе-Lа-Русы” апладысментамі сустракалі і праводзілі ганаровых гасцей лагера – легендарнага Уладзіміра Мулявіна і “Пясняроў”, амерыканскага рок-спевака Ціма Стронга, групы “Манга-Манга”, “Тоні Воткінс Смоўк брэйкерс”, “Мамулькі-Бэнд” і іншых.
У лагеры былі і ёсць свае героі, а таксама ветэраны і навічкі. За гэтыя гады незабыўныя дні правялі тут тысячы маладых людзей з Беларусі, Латвіі, Расіі, а таксама прадстаўнікі моладзі іншых краін.