19 снежня ў галерэі “Лабірынт” адбыўся літаратурны салон “Баль навагрудскага песняра”, прысвечаны 215-годдзю з дня нараджэння Адама Міцкевіча (1798–1855).
Як адзначыла пад час урачыстасці першы намеснік дырэктара Нацыянальнай бібліятэкі Беларусі Алена Далгаполава, у фондах бібліятэкі захоўваецца каля чатырохсот дакументаў, прысвечаных Адаму Міцкевічу. Трыста найменняў увайшло ў экспазіцыю кніжна-ілюстрацыйнай выстаўкі “Перачытаць Міцкевіча ўсяго...”, адкрыццё якой адбылося ў рамках літаратурнага салона.
Сярод экспанатаў выстаўкі да ўвагі гледачоў прадстаўлены выданні ХІХ–ХХ стст., шматлікія партрэты Адама Міцкевіча і ілюстрацыі да яго твораў такіх вядомых мастакоў, як В. Ваньковіч, М. Андрыёлі, Я. Матэйка, Я. Тысевіч, В. Шаранговіч і інш.
“Ёсць пісьменнікі, творы якіх хочацца ілюстраваць. Адзін з такіх пісьменнікаў – Адам Міцкевіч. Гледзячы на ілюстрацыі Васіля Шаранговіча да твораў пісьменніка, ты нібы чуеш гэтыя тэксты! Менавіта дзякуючы ілюстрацыям Шаранговіча я назаўсёды зразумела, што Адам Міцкевіч – беларускі паэт!”, – расказала мастацтвазнаўца Ларыса Міхневіч.
Акрамя польскамоўнага Збору твораў у 17 тамах і рускамоўнага пяцітомніка, экспазіцыя змясціла зборы выбраных твораў, тэматычныя падборкі вершаў і санетаў пісьменніка. Асобнае месца ў экспазіцыі занялі выданні розных гадоў бессмяротных паэм Міцкевіча “Пан Тадэвуш”, “Гражына”, “Конрад Валенрод”. Шэраг кніг распавядае пра сучаснікаў, сяброў і муз паэта. Частка экспазіцыі прысвечана даследаванням жыцця і творчасці Адама Міцкевіча, у тым ліку яго сувязям з беларускім краем.
“Пра Міцкевіча можна гаварыць вельмі доўга. Каб зразумець і спазнаць паэта, трэба пабываць на яго Радзіме. Я прайшоўся па мясцінах Міцкевіча... Паэзія яго нарадзілася з зямлі, на якой ён вырас, з беларускай народнай творчасці, і, безумоўна, не было б у нас такога генія, калі б не было ў яго кахання – Марылі Верашчакі”, – адзначыў пад час імпрэзы беларускі пісьменнік Кастусь Цвірка. Па яго словах, высланы за межы сваёй Радзімы Адам Міцкевіч праз усю сваю творчасць пранёс боль расставання са сваёй зямлёй і сваім каханнем.
Уся творчасць Адама Міцкевіча – гэта сапраўдны гімн Беларусі. Паэт выдатна паказаў жыццё і побыт розных слаёў беларускага грамадства першай паловы ХІХ ст. Веліч і шчырасць любові Адама Міцкевіча да сваёй роднай “Літвы” – тэрыторыі сучаснай Беларусі – можна адчуць, увайшоўшы ў рамантычны свет яго твораў.
Пад час літаратурнага салона святочную атмасферу свецкіх баляў пачатку ХІХ ст. стваралі ўдзельнікі музычна-тэатралізаванага праекта “Doux Souvenir” і гісторыка-танцавальнага праекта “Эпоха Міхала Клеафаса”. Артысты парадавалі гледачоў арыямі з оперы “Яўгеній Анегін”, чытаннем санета, касцюміраванымі танцамі.