22 верасня 2009 года ў музеі кнігі Нацыянальнай бібліятэкі Беларусі адбылося ўрачыстае адкрыццё міжнароднай выстаўкі «Азербайджан, Беларусь і сусветныя класікі ў мініяцюрнай кнізе».
Выстаўка была падрыхтавана дзякуючы супрацоўніцтву Нацыянальнай бібліятэкі Беларусі і Пасольства Рэспублікі Беларусь у Азербайджанскай Рэспубліцы. На выстаўцы прадстаўлены экспанаты прыватнага Музея мініяцюрнай кнігі (г. Баку, Азербайджан), стваральніцай якога з’яўляецца Зарыфа Салахава, а таксама калекцыя мініяцюрнай кнігі з фондаў Нацыянальнай бібліятэкі Беларусі.
У цырымоніі адкрыцця выстаўкі прынялі ўдзел намеснік дырэктара Нацыянальнай бібліятэкі Беларусі па фарміраванні інфармацыйных рэсурсаў Таццяна Васільеўна Кузьмініч, Надзвычайны і Паўнамоцны Пасол Рэспублікі Азербайджан у Рэспубліцы Беларусь Алі Тэймур Аглы Нагіеў, 2-гі сакратар Пасольства Рэспублікі Беларусь у Рэспубліцы Азербайджан Святлана Аляксееўна Карпушына.
Мерапрыемства стала важнай падзеяй у культурным жыцці Беларусі, выклікала шырокі рэзананс сярод спецыялістаў музейнай і выдавецкай справы. У прыватнасці, на цырымоніі адкрыцця выстаўкі мініяцюрнай кнігі выступілі начальнік аддзела выдавецкай дзейнасці Міністэрства інфармацыі Рэспублікі Беларусь Алена Савельеўна Паўлава і дырэктар Нацыянальнага мастацкага музея Рэспублікі Беларусь Уладзімір Іванавіч Пракапцоў.
Калекцыю Музея мініяцюрнай кнігі прадставіла гледачам яго стваральніца Зарыфа Тэймураўна Салахава. У рамках прэзентацыі спадарыня Салахава перадала ў дар Нацыянальнай бібліятэцы Беларусі рад выданняў, прысвечаных гісторыі і культуры Азербайджана. Сярод падараваных выданняў – мініяцюрныя кнігі і CD-дыскі.
З музычнай культурай Азербайджана прысутных пазнаёмілі таленавітыя музыканты Шаміль Мамедаў, які выканаў вакальную кампазіцыю, і Рашыд Амірасланаў, які выступіў з нацыянальным музычным інструментам сазам.
 |
 |
 |
 |
 |
 |
 |
 |
 |
