З 13 мая ў Нацыянальнай бібліятэцы Беларусі праходзіць міжнародная навукова-практычная канферэнцыя "Тэарэтычныя і практычныя аспекты, звязаныя з індывідуальнай канстытуцыйнай скаргай у еўрапейскай мадэлі канстытуцыйнага правасуддзя".
Арганізатары мерапрыемства – Еўрапейская камісія за дэмакратыю праз права (Венецыянская камісія Савета Еўропы) і Канстытуцыйны Суд Рэспублікі Беларусь.
У рамках канферэнцыі прайшлі дыскусіі, падчас якіх удзельнікі абмеркавалі пытанні доступу грамадзян да канстытуцыйнага правасуддзя, вывучылі асаблівасці еўрапейскага канстытуцыйнага судаводства. Беларускія ўдзельнікі канферэнцыі інфармавалі сваіх калег пра формы доступу да канстытуцыйнага правасуддзя ў Рэспубліцы Беларусь.
У мерапрыемстве ўзялі ўдзел суддзі Канстытуцыйнага Суда Рэспублікі Беларусь, еўрапейскія эксперты, кіраўнікі і прадстаўнікі дзяржаўных органаў Рэспублікі Беларусь, вядучыя вучоныя ў галіне канстытуцыйнага права.
Канферэнцыя завершыць сваю работу 14 мая 2010 года.