27 кастрычніка адбыліся ўнікальныя заняткі – сустрэча са знаўцам кніжнай культуры Алесем Сушай. Дзеці ўдзельнічалі ў лекцыі-дыскусіі пра Берасцейскую Біблію, выканалі творчае заданне, пагарталі фаліянт-факсіміле і атрымалі аўтограф даследчыка.
Эксперт Алесь Суша захапіў увагу юных “прафесараў” і распавёў пра Берасцейскую Біблію зразумелай для дзяцей мовай. Каб падтрымаць цікавасць да тэматыкі, ён абапіраўся на сучасныя навуковыя дасягненні і адначасова прадставіў матэрыял даступна і займальна. Дзеці сталі не толькі слухачамі, але і актыўнымі ўдзельнікамі пазнання гісторыі самага загадкавага, прыгожага і дарагога выдання ў айчыннай кніжнай культуры. “Юныя прафесары” смела разважалі, выказвалі розныя гіпотэзы і аргументы, самастойна праводзілі аналіз і рабілі высновы, дзяліліся ўражаннямі.
Удзельнікі заняткаў мелі ўнікальную магчымасць пабачыць не толькі факсіміле, але і арыгінал, які часова экспануецца ў музеі на выставе “Выхад з ценю: невядомы арыгінал Берасцейскай Бібліі”.
Творчае заданне дазволіла праявіць індывідуальныя здольнасці дзетак, замацаваць тэартычную частку занаткаў і творча паглядзець на аб’ект пазнання. Кожны з удзельнікаў крэатыўна аформіў свой тытульны аркуш Берасцейскай Бібліі.
На завяршэнне сустрэчы ўсе жадаючыя атрымалі на памяць аўтограф Алеся Сушы.
Заняткі былі арганізаваны ў межах культурна-асветніцкіх праектаў “Клуб кніжных прафесараў” і “Берасцейская Біблія: адкрыты дотык”.
Матэрыял прадастаўлены навукова-даследчым аддзелам кнігазнаўства.