16 кастрычніка ў Дзелавым і культурным комплексе Пасольства Рэспублікі Беларусь у Расійскай Федэрацыі адбылося ўрачыстае адкрыццё Залы беларускай дыяспары.
Да ўрачыстага мерапрыемства Нацыянальная бібліятэка Беларусі падрыхтавала кніжную выстаўку “Сучасная Беларусь”. Экспазіцыя змяшчае каля 70 энцыклапедычных, навуковых, навукова-папулярных, літаратурна-мастацкіх, рэкламна-інфармацыйных выданняў і складаецца з наступных раздзелаў: “Беларусь стваральная”, “Беларускія брэнды”, “Беларусь спартыўная”, “Беларусь культурная”, “Беларусь літаратурная”. Асобае месца на выстаўцы займае раздзел “Беларусь свабодная”, у якім прадстаўлены кнігі і альбомы, выдадзеныя да 70-годдзя Вялікай Перамогі.
У рамках адкрыцця Залы беларускай дыяспары адбылося падпісанне пагаднення паміж Пасольствам і Нацыянальнай бібліятэкай Беларусі, дзякуючы якому беларусы ў Расіі атрымаюць доступ да электроннага рэсурсу аб нашай краіне, створанага бібліятэкай.
У мерапрыемстве прынялі ўдзел намеснік міністра юстыцыі Рэспублікі Беларусь Сяргей Задзіран, статс-сакратар – намеснік кіраўніка Федэральнага агенцтва па справах нацыянальнасцей Расіі Павел Сямёнаў, дырэктар Нацыянальнай бібліятэкі Беларусі Раман Матульскі, намеснік дырэктара Нацыянальнага цэнтра прававой інфармацыі Рэспублікі Беларусь Аляксандр Бабцоў, прадстаўнікі расійскіх і беларускіх органаў дзяржаўнага кіравання, дыпламатычны корпус, акрэдытаваны ў Расійскай Федэрацыі, студэнты і суайчыннікі, якія пражываюць у Расіі.