25 студзеня адбылося ўрачыстае адкрыццё юбілейнай кніжнай выстаўкі да 90-годдзя Івана Пятровіча Шамякіна і прэзентацыя кнігі “Іван Шамякін. Летапісец эпохі: успаміны, інтэрв'ю, эсэ” выдавецтва “Мастацкая літаратура”.
Напярэдадні 90-годдзя з дня нараджэння народнага пісьменніка Беларусі, Героя Сацыялістычнай Працы, лаўрэата шматлікіх дзяржаўных прэмій і ўзнагарод – Івана Пятровіча Шамякіна Нацыянальная бібліятэка Беларусі сумесна з выдавецтвам “Мастацкая літаратура” прадставіла юбілейную кніжную выстаўку, прысвечаную жыццю і творчай спадчыне пісьменніка, і біяграфічную кнігу “Іван Шамякін. Летапісец эпохі: успаміны, інтэрв’ю, эсэ”.
На кніжнай выстаўцы экспануецца каля 200 выданняў, сярод якіх зборы твораў Івана Шамякіна, выдадзеныя Саюзам пісьменнікаў Беларусі і выдавецтвам “Мастацкая літаратура”; асобныя творы, за якія пісьменнік атрымаў шэраг узнагарод; біяграфічныя і літаратуразнаўчыя публікацыі даследчыкаў яго творчасці.
Кніга “Іван Шамякін. Летапісец эпохі: успаміны, інтэрв’ю, эсэ” выйшла ў папулярнай і прэстыжнай серыі “Жыццё знакамітых людзей Беларусі”. У гэтай кнізе, падрыхтаванай да друку дачкой вядомага празаіка, кандыдатам філалагічных навук Алесяй Іванаўнай Шамякінай, праз успаміны сваякоў, сяброў, літаратараў, архітэктараў узнікае вобраз Мастака і Чалавека ва ўсёй яго філасофскай велічы і прыгажосці.
У мерапрыемстве ўзялі ўдзел дырэктар Нацыянальнай бібліятэкі Беларусі Раман Матульскі; галоўны рэдактар выдавецтва “Мастацкая літаратура” Віктар Шніп; паэт, галоўны рэдактар часопіса “Полымя” Мікола Мятліцкі; паэт, галоўны рэдактар часопіса “Маладосць” Раіса Баравікова; кандыдат філалагічных навук, супрацоўнік Інстытута мовы і літаратуры НАН Беларусі Алеся Шамякіна; доктар філалагічных навук, член Саюза пісьменнікаў Беларусі Таццяна Шамякіна, а таксама вядомыя прадстаўнікі творчай грамадскасці.
Галоўны рэдактар выдавецтва “Мастацкая літаратура” Віктар Шніп перадаў у дар Нацыянальнай бібліятэцы Беларусі экзэмпляр кнігі “Іван Шамякін. Летапісец эпохі: успаміны, інтэрв’ю, эсэ”.
Падчас мерапрыемства былі прадэманстраваны фрагменты мастацкага фільма “Глыбокая плынь”. Музычнай творчасцю гасцей вечара парадаваў фальклорны ансамбль БДУ “Тутэйшая шляхта”.
Выстаўка “Летапісец эпохі” дэманструецца з 25 студзеня па 7 сакавіка ў кальцавым калідоры 2-га паверха Нацыянальнай бібліятэкі Беларусі.
 |
 |
 |
 |
