18 красавіка ў Нацыянальнай бібліятэцы Беларусі ладзілася адкрыццё выстаўкі “Вялікі Статут Вялікага Княства”, прымеркаванай да 425-годдзя зацвярджэння Статута Вялікага Княства Літоўскага 1588 г.
Урачыстае адкрыццё выстаўкі прайшло ў рамках IХ Міжнародных кнігазнаўчых чытанняў “Статут Вялікага Княства Літоўскага ў гісторыі культуры Беларусі”.
З прывітальным словам выступіў дырэктар Нацыянальнай бібліятэкі Беларусі Раман Матульскі. Аб важнасці захавання кніжных помнікаў і паглыбленым вывучэнні Статута ВКЛ выказалі свае думкі дырэктар Музея гісторыі Магілёва Аляксей Бацюкоў, загадчык аддзела публікацыі дакументаў Нацыянальнага гістарычнага архіва Рэспублікі Беларусь Дзмітрый Яцкевіч, прафесар кафедры тэорыі і гісторыі дзяржавы і права юрыдычнага факультэта Беларускага дзяржаўнага ўніверсітэта Таісія Доўнар, намеснік дырэктара Нацыянальнай бібліятэкі Беларусі Аляксандр Суша.
На кніжнай выстаўцы ў галерэі “Лабірынт” экспанаваліся сучасныя перавыданні Статута, навуковыя часопісы, якія ўключаюць даследаванні і каментарыі навукоўцаў – каля 60 выданняў з фонду Нацыянальнай бібліятэкі Беларусі.
Экспазіцыя “Вялікі Статут Вялікага Княства” ў музеі кнігі прадстаўляе арыгінальныя выданні Статута Вялікага Княства Літоўскага з фондаў Нацыянальнай бібліятэкі Беларусі і Музея гісторыі Магілёва.
Адзін з галоўных экспанатаў выстаўкі – Статут 1588 г. на старабеларускай мове, выдадзены ў 1594–1595 гг. у Вільні, у друкарні Мамонічаў. Прадстаўлены таксама перавыданні Статута і іншыя прававыя зборнікі XVI–XIX стст. з фонду бібліятэкі.
Загадчык сектара музейнай дзейнасці Таццяна Сапега правяла экскурсію па ўнікальнай экспазіцыі для удзельнікаў урачыстага мерапрыемства.
Выстаўка “Вялікі Статут Вялікага Княства” ў музеі кнігі Нацыянальнай бібліятэкі Беларусі будзе працаваць да 15 мая 2013 г.
 |
 |
 |
 |
 |
 |
 |
 |
 |
 |
 |
 |
