4 кастрычніка ў Нацыянальнай бібліятэцы Беларусі адбылося ўрачыстае адкрыццё выстаўкі “Францыск Скарына: падарожжа на Радзіму”.
Выстаўка ладзіцца ў рамках сумеснага праекта Міністэрства культуры Рэспублікі Беларусь і Пасольства Федэратыўнай Рэспублікі Германія ў Рэспубліцы Беларусь.
На мерапрыемстве выступілі міністр культуры Рэспублікі Беларусь Павел Латушка, Надзвычайны і Паўнамоцны Пасол Федэратыўнай Рэспублікі Германія ў Рэспубліцы Беларусь Вольфрам Маас, пачэсны госць з Германіі, дырэктар Верхнялужыцкай навуковай бібліятэкі Венцэль Маціс, дырэктар Нацыянальнай бібліятэкі Раман Матульскі, загадчык навукова-даследчага аддзела кнігазнаўства Галіна Кірэева.
На выстаўцы прадстаўлены кнігі Ф. Скарыны з фонду Верхнялужыцкай навуковай бібліятэкі, у тым ліку тыя, якіх няма ў зборах Беларусі, напрыклад, кніга Быцця з цудоўным гравіраваным тытульным аркушам, а таксама чатыры кнігі Царстваў са знакамітым партрэтам беларускага першадрукара і інш.
Верхнялужыцкая навуковая бібліятэка бярэ свой пачатак у XVIII ст. Сёння яна з’яўляецца адным з галоўных цэнтраў па зборы дакументаў, а таксама важным інфармацыйным цэнтрам Германіі, дзе захоўваюцца пражскія выданні Ф. Скарыны – канвалют з 11 кніг. Нацыянальная бібліятэка Беларусі з’яўляецца захавальніцай адзінага ў Беларусі збору кніг Ф. Скарыны (10 кніг Бібліі, выдадзеных у Празе ў 1517–1519 гг.).
Выстаўка першадрукаў Скарыны праходзіць у музеі кнігі Нацыянальнай бібліятэкі Беларусі з 4 па 13 кастрычніка 2012 г.