24 лютага а 17-й гадзіне ў галерэі “Панарама” Нацыянальнай бібліятэкі Беларусі адбудзецца ўрачыстае адкрыццё выстаўкі вядомага ўкраінскага фотамастака Ігара Гайдая.
Мерапрыемства арганізавана Пасольствам Украіны ў Рэспубліцы Беларусь сумесна з Нацыянальнай бібліятэкай Беларусі.
Імя Ігара Гайдая добра вядома не толькі на яго радзіме, але і далёка за яе межамі. Асаблівасцю яго творчасці з’яўляецца магчымасць праз звычайныя рэчы, без штукарства і хітрасцей, убачыць маленькі цуд і падзяліцца ім з другімі людзьмі. Героі яго фотаздымкаў – людзі ў іх рэальным абліччы, шчырыя, свабодныя ад тэатральнасці і штучнасці.
На выстаўцы будуць прадстаўлены тры аўтарскія праекты фотамастака: “Космас украінскага хлеба”, “Украінцы” і “9+3”.
У аснове першага праекта – просты і ў той жа час незвычайны погляд на хлеб. Другі праект – калекцыя фотаздымкаў украінцаў, знакамітых і невядомых, звычайных і неардынарных, старых і маладых, аб’яднаных адной рысай – магчымасцю быць самім сабой перад аб’ектывам. Серыя здымкаў трэцяга праекта – візуальнае сведчанне любові, партрэт сапраўднага шчасця, якое абвяшчае пра сябе з кожным новым крыкам немаўляці.
Выстаўкі гэтых работ ужо дэманстраваліся ва Украіне і Еўропе і атрымалі шырокі рэзананс у прэсе.
