7 красавіка а 16-й гадзіне ў галерэі “Лабірынт” і музеі кнігі (3-ці паверх) адбудзецца адкрыццё нечаканай і першай у сваім родзе выстаўкі “Францыск Скарына і наш час”.
Беларускі першадрукар і асветнік Францыск Скарына (1490–1551) з’яўляецца знакавай постаццю нацыянальнага маштабу. Яго вобраз трывала ўвайшоў у сучасную культурную прастору Беларусі. Ф. Скарыне прысвечаны навуковыя публікацыі, існуе навуковая дысцыпліна “Скарыназнаўства”, заснаваны дзяржаўныя ўзнагароды яго імя (медаль і ордэн), яго імем названы адукацыйныя ўстановы, вуліцы; адкрыты помнікі першадрукару.
У межах праекта пачынальнік усходнеславянскага кнігадрукавання, “волат эпохі Адраджэння” паўстане як наш сучаснік. Падчас выстаўкі ўпершыню прастора музея кнігі будзе занятай не кнігамі. Наведвальнікі атрымаюць магчымасць акунуцца ў сучасны свет успрымання сімвалаў і вобразаў беларускага першадрукара, адшукаць яго пазнакі ў прадметах побыту, школьных аксесуарах, карпаратыўнай атрыбутыцы; у студэнцкай і ўвогуле маладзёжнай субкультуры, асяродку вучоных і калекцыянераў; у мастацкім ўвасабленні вобраза ў тэатры і кіно.
Экспануюцца матэрыялы са збораў Нацыянальнай бібліятэкі Беларусі, Нацыянальнага гістарычнага музея Рэспублікі Беларусь (філіялаў “Музей гісторыі тэатральнай і музычнай культуры” і “Музей гісторыі беларускага кіно”), Нацыянальнага полацкага гісторыка-культурнага музея-запаведніка, Гомельскага дзяржаўнага ўніверсітэта імя Ф. Скарыны, гімназіі № 1 імя Ф. Скарыны г. Мінска, Полацкай дзяржаўнай гімназіі імя Ф. Скарыны, мінскай кавярні “У Францыска”, прыватных калекцыянераў.
Выстаўка рэалізавана пры падтрымцы генеральнага партнёра праекта – кампаніі МТС.
Кантактны тэлефон: (8 017) 293 25 85.