29 студзеня 2009 года а 17-й гадзіне ў галерэі “Ракурс” Нацыянальнай бібліятэкі Беларусі адбудзецца ўрачыстае адкрыццё выстаўкі “Арт-крок”.
Свой чарговы выставачны год Нацыянальная бібліятэка Беларусі пачынае з таго, што адразу тры галерыі – «Лабірынт», «Атрыум» і «Ракурс» – прадастаўляе грамадскаму аб'яднанню «Міжнародная гільдыя жывапісцаў». Любімыя ўсімі святы і пачатак кожнага года гэта творчая суполка адзначае выстаўкай «Арт-крок», якая ладзіцца ўсімі яе сябрамі.
У новы час – з новым! Ад іншых праектаў “Міжнароднай гільдыі жывапісцаў” гэта выстаўка адрозніваецца тым, што кожны яе ўдзельнік прадстаўляе па ўласным выбары новыя работы, якія стварыў за апошні год і якія яшчэ нідзе не экспанаваліся. Такі падыход дае магчымасць непасрэднага знаёмства з жывым творчым працэсам, што цікава як шырокім глядацкім колам, так і ўсім аматарам і знаўцам мастацтва. Вольнасць выбару і час выканання твораў дазваляе прасачыць кірункі творчай думкі і шляхі развіцця найноўшых мастацкіх тэндэнцый. Але магчыма, што нам прапануюць яшчэ раз ацаніць «добрае старое мастацтва», якое, можа, крыху пазней будзе лічыцца класікай. Паколькі сёння сярод сяброў гільдыі ёсць фотамастакі і нават скульптары, уражанні ад выстаўкі будуць самыя разнастайныя.
У новым «Арт-кроку – 2009» прымуць удзел каля 50 беларускіх творцаў. Сярод іх ёсць і тыя, хто яшчэ толькі-толькі пачынае свой творчы шлях, і мастакі, добра вядомыя беларускаму гледачу: Васіль Касцючэнка і Уладзімір Ганчарук, Сяргей Давідовіч і Зміцер Сурыновіч, Алесь Забаўчык і Уладзімір Кожух, Алесь Ксяндзоў і Зоя Луцэвіч, Сяргей Рымашэўскі і Уладзімір Рынкевіч, Андрусь Скіцеў і Федар Ястраб, Аляксандр Некрашэвіч і іншыя.
Уваход цэнтральны.
Тэл. для даведак: 293-28-23, 293-27-67.
Е-mail: pr@nlb.by