26 лютага а 16-й гадзіне ў галерэі “Ракурс” Нацыянальнай бібліятэкі Беларусі адбудзецца ўрачыстае адкрыццё выстаўкі “Арт-крок”.
Выставачны праект “Арт-крок” традыцыйна на пачатку года ладзіць Міжнародная гільдыя жывапісцаў сумесна з Нацыянальнай бібліятэкай Беларусі.
Грамадскае аб'яднанне “Міжнародная гільдыя жывапісцаў” – гэта калектыў самых вядомых і паспяховых мастакоў нашай краіны. Штогадова год яны прадстаўляюць на суд гледачам свае новыя работы, выкананыя за апошні год. Такі падыход дае магчымасць самага непасрэднага знаёмства з жывым творчым працэсам, што цікава і шырокім глядацкім колам, і ўсім аматарам і знаўцам мастацтва.
Вольнасць выбару і час выканання твораў дазваляе прасачыць развіццё найноўшых мастацкіх тэндэнцый. Паколькі на выстаўцы гільдыі сёння ёсць і жывапісцы, і фотамастакі, і мастакі дэкаратыўна-прыкладнога мастатва, уражанні ад яе будуць самымі разнастайнымі, колькасць удзельнікаў зробіць гэту творчую акцыю вельмі паўнаважкай і прадстаўнічай.
У новым “Арт-кроку – 2013” возьмуць удзел каля 40 беларускіх творцаў. Сярод іх і тыя, хто яшчэ толькі-толькі пачынае свой творчы шлях, а таксама мастакі, імёны якіх добра вядомыя беларускаму гледачу. Гэта Васіль Касцючэнка і Уладзімір Ганчарук, Сяргей Давідовіч і Зміцер Сурыновіч, Алесь Забаўчык і Уладзімір Кожух, Алесь Ксяндзоў, Мікалай Бушчык, Фёдар Ястраб, Уладзімір Рынкевіч і інш.
Творы будуць прадстаўлены адразу ў дзвюх галерэях Нацыянальнай бібліятэкі Беларусі – “Лабірынт” і “Ракурс”.
Выстаўка будзе доўжыцца да 13 сакавіка 2013 года.
Тэлефоны для даведак: (8 017) 293 27 67, 293 28 33.
Е-mail: pr@nlb.by
