25 чэрвеня ў Нацыянальнай бібліятэцы Беларусі адбылося адкрыццё дакументальна-мастацкай праграмы “Беларусь нескароная”, прымеркаванай да 65-годдзя вызвалення Беларусі ад нямецка-фашысцкіх захопнікаў.
У ходзе мерапрыемства адбыўся шэраг прэзентацый. Гасцям былі прадстаўлены электроннае выданне “Подпольная и партизанская печать Беларуси”, якое стваралася спецыялістамі Нацыянальнай бібліятэкі Беларусі, Нацыянальнага архіва Рэспублікі Беларусь, Беларускага дзяржаўнага музея гісторыі Вялікай Айчыннай вайны пры падтрымцы ЮНЕСКА, і навінкі выдавецтва “Беларуская энцыклапедыя імя П. Броўкі” (Ю. Фамін “Человек из легенды”, зборнік “О погибших помните”).
У рамках праграмы “Беларусь нескароная” ў Нацыянальнай бібліятэцы Беларусі арганізавана аднайменная кніжна-дакументальная выстаўка, прадстаўленая кнігамі, дакументамі і артэфактамі, і мастацкая выстаўка Анатоля Наліваева “Мінскія пейзажы з 1945 па 1960 гг.”, прысвечаная 65-годдзю вызвалення Беларусі ад нямецка-фашысцкіх захопнікаў. У музеі кнігі прысутныя змаглі пазнаёміцца з кніжна-дакументальнай выстаўкай падпольнага і партызанскага друку 1942–1944 гг. з фондаў Нацыянальнай бібліятэкі Беларусі і Беларускага дзяржаўнага музея гісторыі Вялікай Айчыннай вайны.
Выстаўкі будуць працаваць у наступным рэжыме: “Падпольны і партызанскі друк Беларусі 1942–1944 гг.” – да 31 ліпеня (музей кнігі), кніжна-дакументальная выстаўка “Беларусь нескароная” – да 31 жніўня (кальцавы калідор, 3-ці паверх), “Мінскія пейзажы з 1945 па 1960 гг.” А. Наліваева – да 1 жніўня (мабільная галерэя, 3-ці паверх).