18 кастрычніка а 16-й гадзіне ў галерэі “Лабірынт” (3-ці паверх) адбудзецца адкрыццё літаратурна-мастацкага выставачнага праекта “Залатыя аўтографы на нябёсах”.
Пазалочаныя Колас і Маякоўскі, “скураныя” анёлы і гадзіннікавыя механізмы… Выстаўка “два ў адным” пазнаёміць наведвальнікаў бібліятэкі з творчасцю аўтараў, аб’яднаных асаблівым стаўленнем да Кнігі як пазачасовай крыніцы сапраўдных духоўных каштоўнасцей.
У экспазіцыю “Залатыя аўтографы” ўвайшлі партрэты паэтаў, пісьменнікаў, артыстаў у тэхніцы “сусальнае золата на чорным аргшкле”. Сярод 26-ці прадстаўленых работ лёгка пазнавальныя вобразы Пушкіна і Булгакава, усімі любімай тройцы – Віцына, Нікуліна і Маргунова, а таксама легендарнай актрысы савецкага кінематографа Ноны Мардзюковай.
Аўтар работ – малады італьянскі мастак беларускага паходжання Віталь Адзінцоў, вядомы ў творчых колах пад псеўданімам Эмануэль Хендрыкс. Віталь распрацаваў аўтарскую тэхніку стварэння партрэтаў, у якой асноўным мастацкім матэрыялам з’яўляецца золата – пластычнае, фактурнае, багатае і, дарэчы, вельмі дарагое.
Аўтарам другой экспазіцыі з рамантычнай назвай “Аўтографы на нябёсах” з’яўляецца член Беларускага саюза мастакоў і Саюза пісьменнікаў Беларусі, намеснік дырэктара Гомельскай абласной універсальнай бібліятэкі імя У.І. Леніна Алег Ананьеў. Дванаццаць аўтарскіх кампазіцый, асноўным матэрыялам якіх з’яўляецца скура, настройваюць гледача на дыялог з нябёсамі. Ва ўсіх работах пададзены выявы Анёлаў, Часу і Кнігі, у якую ўпісаны аўтарскія паэтычныя радкі.
Прадстаўляючы Італію і Беларусь, абодва мастакі звяртаюцца да літаратурнай спадчыны славян, кожны па-свойму ствараюць галерэю вобразаў.
Тэлефон для даведак: (8 017) 293 27 56.
Е-mail: pr@nlb.by