22 жніўня а 16-й гадзіне ў галерэі “Лабірынт” (3-ці паверх) адбудзецца ўрачыстае адкрыццё мастацкай выстаўкі “Слова”, прысвечанай 1150-годдзю славянскага пісьменства.
Выстаўка “Слова” даследуе феномен узаемапранікнення выявы і тэксту ў сучасным беларускім мастацтве. Яшчэ ў глыбокай старажытнасці рукапісныя кнігі ўпрыгожваліся мудрагелістымі буквіцамі, утрымлівалі жывапісныя мініяцюры.
Прадаўжальнікамі старажытнага мастацтва прыгожага пісьма – каліграфіі – з’яўляюцца сябры мастацкай суполкі “ЛітАрт” на чале з прафесарам, лаўрэатам прэміі “За духоўнае адраджэнне” Паўлам Апанасавічам Семчанкам, чые творы займаюць ганаровае месца на выстаўцы “Слова”. Да беларускіх каліграфаў далучыўся майстар з Кітая Лі Цзо. На адкрыцці выстаўкі Лі Цзо разам з вядомым беларускім мастаком Генадзем Мацурам пакажуць відовішчны майстар-клас па мастацтве каліграфіі.
З найбольш яскравых момантаў выстаўкі “Слова” можна згадаць дызайнерскія майкі Уладзіміра Цеслера, палотны жывапісца-віртуоза Анатоля Кузняцова, тэкставыя канцэптуальныя работы фотамастака Ігара Саўчанкі і інш.
Цікавасць як для аматараў прыгожага, так і для бібліяфілаў выклікаюць арт-кнігі, створаныя ў адзінкавых экзэмплярах. Новыя работы ў гэтым жанры прадставяць мастак М. Барздыка і паэт Міхась Башлакоў.
У межах мастацкай выстаўкі “Слова” на 3-м паверсе кальцавога калідора Нацыянальная бібліятэка Беларусі падрыхтавала тэматычную кніжную выстаўку “У пачатку было слова”. Экспазіцыя налічвае каля 200 выданняў: кнігі пра ўзнікненне і развіццё пісьменства на славянскіх землях, пра гісторыю кірылічнай пісьменнасці, пра помнікі дакірылічнай пісьменнасці і руны, а таксама кнігі старажытнарускіх і ўкраінскіх летапісаў. У экспазіцыі прадстаўлены і выданні, у якіх адлюстравана гісторыя зараджэння і развіцця пісьменства на Беларусі, расказваецца пра помнікі старажытнай беларускай літаратуры. Асаблівая ўвага нададзена кнігам, якія прысвечаны беларускім асветнікам.
Мастацкая выстаўка “Слова” будзе працаваць да 13 кастрычніка 2013 г.
Кніжная выстаўка “У пачатку было слова” будзе доўжыцца да 30 снежня 2013 г.
Тэлефоны для даведак: (8 017) 293 27 67, 293 28 33, 293 29 80.
Е-mail: pr@nlb.by
