18 красавіка а 10-й гадзіне ў канферэнц-зале адбудзецца ўрачыстае адкрыццё IХ Міжнародных кнігазнаўчых чытанняў “Статут Вялікага Княства Літоўскага ў гісторыі культуры Беларусі”.
У рамках канферэнцыі ў Мінску збяруцца спецыялісты па Статуту 1588 г., даследчыкі кніжнай і прававой культуры Вялікага Княства Літоўскага. У канферэнцыі возьмуць удзел вучоныя з Беларусі, Расіі, Літвы, Латвіі, Украіны, Польшчы і Італіі.
Перыяд Вялікага Княства Літоўскага – дзяржавы, палітыка-эканамічным цэнтрам якой былі беларускія землі, з’яўляецца адным з найбольш цікавых і важных гістарычных этапаў беларускай дзяржаўнасці. Асабліва гэта датычыцца XVI стагоддзя, на працягу якога ў грамадстве пашыраюцца новыя, гуманістычныя і рэфармацыйныя, ідэі. XVI стагоддзе пазначылася і прававой рэформай, вынікам якой стала стварэнне Статутаў – знакамітых зводаў законаў. Мінула 425 гадоў, як быў уведзены ў дзеянне Трэці Статут.
IХ Міжнародныя кнігазнаўчыя чытанні адлюструюць сучасныя дасягненні навукоўцаў у справе вывучэння гэтага ўнікальнага помніка права, які мае выключнае значэнне для фарміравання нацыянальнай і агульначалавечай культуры. Нездарма Статут ВКЛ 1588 г. лічыцца адным з першых канстытуцыйных зводаў. Удзельнікі канферэнцыі разгледзяць Статут у кантэксце развіцця еўрапейскай кніжнай і прававой культуры, а таксама прадставяць новыя даследаванні па гісторыі і культуры Вялікага Княства Літоўскага, гісторыі кніжных помнікаў і калекцый, па захаванні і папулярызацыі кніжнай спадчыны.
Усе зацікаўленыя запрашаюцца для ўдзелу ў якасці слухачоў у адкрыцці IХ Міжнародных кнігазнаўчых чытанняў.