8 ліпеня ў галерэі “Лабірынт” Нацыянальнай бібліятэкі Беларусі адбылося адкрыццё гісторыка-культурнага праекта “Грунвальд-600”.
У рамках праекта прайшла прэзентацыя кнігі Юрыя Бохана “Ваяры Грунвальдскай бітвы” і камплекта паштовак “Грунвальдская бітва ў выявах: па матэрыялах з фондаў Нацыянальнай бібліятэкі Беларусі”.
Арганізатарамі мерапрыемства выступілі Нацыянальная бібліятэка Беларусі і РУП «Выдавецтва “Беларусь”».
Кніга “Ваяры Грунвальдскай бітвы” прысвечана найважнейшай падзеі перыяду двухсотгадовага процістаяння насельніцтва беларускіх зямель агрэсіі крыжаносцаў – Грунвальдскай бітве, якая адбылася 15 ліпеня 1410 года. Разлічана выданне на гісторыкаў, студэнтаў і вучняў сярэдняй школы – на ўсіх, хто цікавіцца гісторыяй Беларусі. Выпушчана кніга ў выдавецтве "Беларусь" тыражом у 3 тыс. экзэмпляраў.
Самай маштабнай бітве Сярэднявечча прысвечаны і камплект паштовак “Грунвальдская бітва ў выявах”, які падрыхтаваны па матэрыялах з фондаў Нацыянальнай бібліятэкі Беларусі: гравюрах, рэпрадукцыях, ілюстрацыях. У камплект уваходзіць 16 паштовак.
У прэзентацыі ўзялі ўдзел дырэктар Нацыянальнай бібліятэкі Беларусі Раман Матульскі, кансультант упраўлення выдавецкай дзейнасці кніжнага гандлю Міністэрства інфармацыі Рэспублікі Беларусь Валерый Рагалевіч, выконваючая абавязкі дырэктара выдавецтва “Беларусь” Валянціна Пінчук, аўтар манаграфіі “Ваяры Грунвальдскай бітвы” Юрый Бохан, рэдактар кнігі Алена Шагун і загадчык інфармацыйна-аналітычнага аддзела Нацыянальнай бібліятэкі Беларусі Людміла Гарбачова.
Музычнае суправаджэнне вечара забяспечыў струнны квартэт “Капрыз”.
 |
 |
 |
 |
 |
 |
