8 ліпеня а 16-й гадзіне ў галерэі “Лабірынт” Нацыянальнай бібліятэкі Беларусі адбудзецца адкрыццё гісторыка-культурнага праекта “Грунвальд-600”.
У рамках праекта пройдзе прэзентацыя кнігі Юрыя Бохана “Ваяры Грунвальдскай бітвы” і камплекта паштовак “Грунвальдская бітва ў выявах: па матэрыялах з фондаў Нацыянальнай бібліятэкі Беларусі”.
Арганізатарамі мерапрыемства выступілі Нацыянальная бібліятэка Беларусі і РУП «Выдавецтва “Беларусь”».
Кніга “Ваяры Грунвальдскай бітвы” прысвечана найважнейшай падзеі перыяду двухсотгадовага процістаяння насельніцтва беларускіх зямель агрэсіі крыжаносцаў – Грунвальдскай бітве, якая адбылася 15 ліпеня 1410 года. Аўтар паспрабаваў прасачыць не толькі ваенныя падзеі, але і перадгісторыю бітвы – ад з’яўлення немцаў ва Усходняй Прыбалтыцы да пачатку Вялікай вайны 1409–1411 гадоў, кульмінацыяй якой стала бітва пад Грунвальдам. Кніга разлічана на гісторыкаў, студэнтаў і навучэнцаў, усіх, хто цікавіцца гісторыяй.
Самай маштабнай бітве Сярэднявечча прысвечаны і камплект паштовак “Грунвальдская бітва ў выявах”, які падрыхтаваны па матэрыялах з фондаў Нацыянальнай бібліятэкі Беларусі: гравюрах, рэпрадукцыях, ілюстрацыях. У камплект уваходзіць 16 паштовак.
У прэзентацыі возьмуць удзел прадстаўнікі Міністэрства інфармацыі і Міністэрства культуры Рэспублікі Беларусь, Нацыянальнай бібліятэкі Беларусі, выдавецтваў, а таксама аўтары выданняў.
Кантактныя тэлефоны: 293-27-67, 293-27-19.
Е-mail: pr@nlb.by