18 студзеня ў галерэі “Лабірынт” Нацыянальнай бібліятэкі Беларусі адбылося ўрачыстае адкрыццё фестывалю пейзажа, прысвечанага Міжнароднаму году лясоў.
Генеральная Асамблея ААН абвясціла 2011 год Міжнародным годам лясоў. Да гэтай даты запланаваны шэраг мерапрыемстваў ва ўсім свеце. Беларусь не выключэнне, у першую чаргу таму, што лес для нашай краіны – гэта адзін з самых галоўных прыродных скарбаў, які займае амаль палову яе тэрыторыі.Нацыянальная бібліятэка Беларусі сумесна з Міжнароднай гільдыяй жывапісцаў з нагоды абвяшчэння 2011 года Міжнародным годам лясоў прадставіла ўласны культурны праект, накіраваны на прыцягненне ўвагі грамадскасці да захавання і абароны прыроднага скарбу краіны, – фестываль пейзажа.
Сваё трапяткое стаўленне да лесу, да жывой прыроды праз жывапіс, графіку, фота выказалі вядомыя беларускія мастакі: Аляксандр Грышкевіч, Ягор Батальёнак, Георгій Паплаўскі, Валерый Вядрэнка і многія іншыя.
Адкрыў фестываль куратар праекта, старшыня Міжнароднай гільдыі жывапісцаў Фёдар Ястраб. На вернісажы таксама выступілі мастак Дзмітрый Сурыновіч, жывапісец Анатоль Бяляўскі, член савета ГА “Фотамастацтва” Іван Пятровіч.
Музычныя кампазіцыі ўвазе гледачоў прадставіла студэнтка філалагічнага факультэта Беларускага дзяржаўнага ўніверсітэта Вольга Кірлік.
Выстаўка будзе доўжыцца да 28 лютага ў галерэях “Атрыум” і “Лабірынт” Нацыянальнай бібліятэкі Беларусі.