18 кастрычніка ў бібліятэцы адбылося ўрачыстае адкрыццё V Міжнароднага кангрэса “Бібліятэка як феномен культуры”.
Арганізатары мерапрыемства – Міністэрства культуры Рэспублікі Беларусь і Нацыянальная бібліятэка Беларусі. У якасці партнёраў форуму выступілі Нацыянальны цэнтр прававой інфармацыі Рэспублікі Беларусь, Пасольства Злучаных Штатаў Амерыкі ў Рэспубліцы Беларусь, Польскі інстытут у Мінску. Галоўная тэма кангрэса ў гэтым годзе – “Камфортнае асяроддзе бібліятэк: новыя тэхналагічныя і матэрыяльна-тэхнічныя рашэнні”.
Адкрыў кангрэс дырэктар Нацыянальнай бібліятэкі Беларусі Раман Матульскі. З прывітальным словам і пажаданнем плённай працы да ўдзельнікаў звярнуліся міністр культуры Рэспублікі Беларусь Юрый Бондар і намеснік дырэктара Нацыянальнага цэнтра прававой інфармацыі Рэспублікі Беларусь Віктар Шаршун. Ва ўрачыстай абстаноўцы адбыліся цырымоніі ўзнагароджання пераможцаў XXVI Рэспубліканскага конкурсу “Бібліятэка – асяродак нацыянальнай культуры” і Рэспубліканскага конкурсу на лепшы публічны цэнтр прававой інфармацыі.
У рамках работы кангрэса былі падведзены вынікі сумесных выставачных мерапрыемстваў, якія праходзілі ў Нацыянальнай бібліятэцы ў 2018 годзе.
У рамках святкавання 500-годдзя беларускага кнігадрукавання ў бібліятэцы была арганізавана выстаўка мастацкіх галаграм“Асвета. Пазнанне. Прагрэс”. Раман Матульскі павітаў арганізатара дадзенага праекта Леаніда Таніна і ўручыў дыплом з удзячнасцю за плённае супрацоўніцтва і значны ўклад у рэалізацыю сумеснага праекта. У сваю чаргу старшыня Савета дырэктараў ЗАТ “Галаграфічная індустрыя” Леанід Танін перадаў у дар Нацыянальнай бібліятэцы галаграфічнае ўзнаўленне развароту “Кнігі Царстваў” Францыска Скарыны.
Вялікі рэзананс у грамадстве атрымаў міжнародны выставачны праект “Беларусь і Біблія”, арганізаваны Нацыянальнай бібліятэкай і Групай даследавання рукапісаў (ЗША). Упершыню ў рамках адной выстаўкі ў Беларусі былі прадэманстраваны найбольш каштоўныя кніжныя рарытэты, узрост якіх дасягае 5 тысяч гадоў. Дыпломы з падзякамі за плённае супрацоўніцтва і значны ўклад у рэалізацыю сумесных праектаў Раман Матульскі ўручыў дырэктару Групы даследавання рукапісаў Скоту Кэралу, а таксама выканаўчаму дырэктару Дэніс Кэрал, адміністрацыйнаму дырэктару Дэвіду Эдынгтону, навуковым супрацоўнікам Джону і Энжэл Слайф, каардынатару па лагістыцы Паўлу Дзядчэнку, супрацоўніку па лагістычнай падтрымцы Марджэры Эдынгтон. З вялікай удзячнасцю Скот Кэрал прыняў у дар ад бібліятэкі факсімільнае выданне “Кніжная спадчына Францыска Скарыны”.
На пленарным пасяджэнні ўдзельнікі ўзнімалі пытанні развіцця матэрыяльна-тэхнічнай базы бібліятэк, а таксама новых тэхнічных ідэй для стварэння камфортных умоў у бібліятэках, абмеркавалі тэмы праектавання, будаўніцтва і эксплуатацыі бібліятэчных будынкаў у Беларусі і за мяжой.
Для ўдзельнікаў кангрэса працуе выстаўка “Бібліятэкі будучыні: тэхналогіі, будынкі, абсталяванне”, дзе прадстаўлены найнавейшыя дасягненні ў сферы інфарматызацыі і тэхнічнага абсталявання бібліятэк, шырокі спектр прадукцыі і паслуг кампаній, якія займаюцца прамысловай вытворчасцю і продажам стэлажнага, асвятляльнага і іншага абсталявання, праектаваннем і абслугоўваннем сістэм бяспекі і супрацьпажарнай абароны.
У рамках кангрэса 18–19 кастрычніка ў залах Нацыянальнай бібліятэкі пройдуць прэзентацыі, майстар-класы і круглыя сталы.
19 кастрычніка жадаючыя змогуць наведаць публічную лекцыю прафесійнага бібліятэкара, кіраўніка кампаніі 21st Century Libraries Consulting Чарльза Форэста (ЗША).
Тэлефоны для даведак: (8 017) 293 28 81, 266 37 07.
Е-mail: pr@nlb.by