20 верасня ў Ташкенце ў Нацыянальнай бібліятэцы Узбекістана імя Алішэра Наваі адбылася ўрачыстая цырымонія перадачы беларускіх выданняў у Залу ведаў Шанхайскай арганізацыі супрацоўніцтва (ШАС).
Каштоўныя літаратурна-мастацкія, навуковыя, навукова-папулярныя выданні, энцыклапедыі, даведнікі і фотаальбомы былі перададзены Нацыянальнай бібліятэкай Беларусі ў рамках святкавання 100-гадовага юбілею “алмаза ведаў” і міжнароднага праекта “Беларусь сёння”.
У мерапрыемстве ўзялі ўдзел Надзвычайны і Паўнамоцны Пасол Рэспублікі Беларусь у Рэспубліцы Узбекістан Леанід Марыніч, Саветнік Пасольства Рэспублікі Узбекістан у Рэспубліцы Беларусь Рахматула Назараў, дырэктар Цэнтра народнай дыпламатыі ШАС Кабулжон Сабіраў, дырэктар Нацыянальнай бібліятэкі Узбекістана імя Алішэра Наваі Уміда Цешабаева, прадстаўнікі міністэрстваў і ведамстваў, знаўцы і спецыялісты беларускай мовы і культуры, студэнты, творчая інтэлігенцыя, прадстаўнікі СМІ і ўдзельнікі беларускага культурнага цэнтра “Світанак”.
З прывітальным словам у анлайн-рэжыме да ўдзельнікаў мерапрыемства звярнулася генеральны дырэктар Нацыянальнай бібліятэкі Беларусі Аксана Кніжнікава: “Праект «Беларусь сёння» ўносіць значны ўклад у пашырэнне дружалюбных адносін і папулярызацыю культурнага абмену паміж нашымі краінамі. Узбекскаму чытачу калекцыя кніг прадставіць Беларусь ва ўсёй яе разнастайнасці: пазнаёміць са шматвяковай гісторыяй, пакажа сучаснае жыццё і культурныя дасягненні, багатыя нацыянальныя традыцыі”.
Прадстаўнікі Залы ведаў падзякавали беларускаму боку за перададзеныя ў дар кнігі і выказалі надзею на далейшае цеснае супрацоўніцтва ў мэтах умацавання культурна-гуманітарнага супрацоўніцтва дзяржаў-удзельніц ШАС.
Матэрыял пададзены аддзелам сувязей з грамадскасцю.
