31 мая ў рамках V Форуму бібліятэкараў Беларусі ў шэрагу сталічных бібліятэк прайшлі майстар-класы, а на базе Цэнтральнай гарадской бібліятэкі г. Жодзіна – выязное пасяджэнне “Інавацыйныя формы работы публічнай бібліятэкі”.
Шэсць мінскіх бібліятэк падрыхтавалі для ўдзельнікаў форуму розныя майстар-класы, падчас якіх падзяліліся вопытам правядзення сацыякультурных мерапрыемстваў для дзяцей, студэнтаў, пажылых людзей, раскрылі сакрэты прыцягнення валанцёраў да рэалізацыі бібліятэчных праектаў, а таксама прадэманстравалі інавацыйныя падыходы да арганізацыі чытацкай прасторы.
Загадчыца сектара кніжных выставак аддзела галерэйна-выставачнай дзейнасці Нацыянальнай бібліятэкі Беларусі Ірына Васількавіч падзялілася з удзельнікамі форуму вопытам арганізацыі выставачнай дзейнасці ў бібліятэцы.
У Навуковай бібліятэцы Беларускага нацыянальнага тэхнічнага ўніверсітэта прайшоў майстар-клас “Бібліятэчны каворкінг: ад ідэі да работы над памылкамі. Вопыт Навуковай бібліятэкі БНТУ”, у Мінскай абласной бібліятэцы імя А.С. Пушкіна – “Валанцёры і бібліятэка: вопыт арганізацыі бясплатных курсаў вывучэння замежных моў”, а ў Бібліятэцы № 7 імя Я. Коласа – “Арганізацыя аматарскіх аб’яднанняў пры бібліятэках”.
Калегі з Цэнтральнай дзіцячай бібліятэкі падчас майстар-класа распавялі прысутным, як арганізаваць работу з дзецьмі, каб прыцягнуць іх увагу і выклікаць жывую цікавасць у маленькіх чытачоў. А вось як працаваць са студэнцкай аўдыторыяй і аптымальна арганізаваць прастору бібліятэкі ВНУ, можна было даведацца ў Фундаментальнай бібліятэцы Беларускага дзяржаўнага ўніверсітэта.
Удзельнікі форуму таксама наведалі Цэнтральную гарадскую бібліятэку г. Жодзіна, дзе пазнаёміліся з інавацыйнымі формамі бібліятэчнага абслугоўвання насельніцтва. Прыемным працягам працоўнага дня стала знаёмства з выдатнымі мясцінамі горада і экскурсія на адно з вядучых рэспубліканскіх прадпрыемстваў – ААТ “БелАЗ”.
Сёння, 1 чэрвеня, адбылося выніковае пасяджэнне і закрыццё V Форуму бібліятэкараў Беларусі. Удзельнікі абмеркавалі вынікі двухдзённай плённай працы і намецілі новыя напрамкі ў пытаннях арганізацыі карпаратыўнага ўзаемадзеяння бібліятэк рэспублікі.
Чытайце таксама аб адкрыцці і першым дні работы V Форуму бібліятэкараў Беларусі.
