Кіраўніцтва Пскоўскай абласной універсальнай навуковай бібліятэкі выказала падзяку калектыву Нацыянальнай бібліятэкі Беларусі за ветлівы прыём на беларускай зямлі ўдзельнікаў Міжнароднай школы "Менеджмент якасці ў бібліятэчнай дзейнасці", што адбылася 8-10 кастрычніка.
8 кастрычніка ў рамках Школы ў Нацыянальнай бібліятэцы Беларусі прайшоў Рэспубліканскі семінар "Інфарматызацыя бібліятэк: новы этап развіцця", у рабоце якога прынялі ўдзел дырэктары абласных бібліятэк і спецыялісты кіравання культуры па бібліятэчных пытаннях. Гасцямі семінара стала дэлегацыя спецыялістаў-прадстаўнікоў з абласных бібліятэк Расіі і Украіны.
9 кастрычніка Міжнародная школа якасці працягнула сваю работу. Удзельнікі наведалі Цэнтральную гарадскую бібліятэку г. Жодзіна і Цэнтральную раённую бібліятэку г. Барысава, дзе замежныя спецыялісты атрымалі магчымасць пазнаёміцца з работай беларускіх бібліятэк, пагаварыць з калегамі.
Расійскіх і ўкраінскіх гасцей зацікавілі пытанні навукова-метадычнага забеспячэння дзейнасці бібліятэк Беларусі, што асвятліла ў сваім дакладзе "Научно-методическое обеспечение деятельности публичных библиотек Республики Беларусь" Кірухіна Людміла Генадзьеўна, намеснік дырэктара па навуковай рабоце і сувязям з грамадскасцю Нацыянальнай бібліятэкі Беларусі.
Аб ключавой ролі абласной бібліятэкі ў рэгіянальнай бібліятэчнай інфармацыйнай сістэме распавяла Чуева Наталля Станіславаўна, дырэктар Мінскай абласной бібліятэкі імя А.С.Пушкіна.
Чарнова Тамара Паўлаўна, дырэктар Жодзінскай гарадской цэнтралізаванай бібліятэчнай сістэмы, у дакладзе "Трансформация библиотеки в современный информационный центр: использование новых технологий" на прыкладзе Цэнтральнай гарадской бібліятэкі г. Жодзіна прадэманстравала, як пасродкам выкарыстання новых тэхналогій бібліятэка паступова пераўтвараецца ў сучасны інфармацыйны цэнтр.
Даклад "Роль Центральной библиотеки г. Борисова в формировании информационного пространства региона" Слесарэнка Галіны Міхайлаўны, дырэктара Барысаўскай раённай цэнтралізаванай бібліятэчнай сістэмы, пазнаёміў удзельнікаў Школы з асаблівасцямі работы Цэнтральнай раённай бібліятэкі г. Барысава, паказаў яе вядучую ролю ў фармаванні інфармацыйнай прасторы рэгіёна.
10 кастрычніка замежныя госці пазнаёміліся з работай Мінскай абласной бібліятэкі імя А.С.Пушкіна; Цэнтральнай бібліятэкі імя Я.Купалы г. Мінска; Цэнтральнай дзіцячай бібліятэкі імя М.Астроўскага г. Мінска.
Зносіны ў рамках Міжнароднай школы якасці дазволілі замежным гасцям не толькі паслухаць беларускіх калег, але і расказаць аб развіцці бібліятэчнай галіны ў сваіх рэгіёнах, што зрабіла мерапрыемства карысным як для замежных, так і для беларускіх удзельнікаў.
