1 чэрвеня адбылася рабочая нарада кіраўнікоў і спецыялістаў Нацыянальнай бібліятэкі Беларусі, рэспубліканскіх і абласных бібліятэк па пытанні распрацоўкі новай рэдакцыі дзяржаўнага стандарту СТБ 7.20/ПР_2 “Бібліятэчная статыстыка. Асноўныя палажэнні”.
Актуалізацыя дакумента была ініцыявана рашэннем калегіі Міністэрства культуры Рэспублікі Беларусь ад 20.05.2021 і ўключана ў План дзяржаўнай стандартызацыі Рэспублікі Беларусь на 2022–2023 г.
Нацыянальная бібліятэка ўзначальвае гэтую працу. Тэхнічнае заданне на перагляд СТБ, распрацаванае ёю, было зацверджана Міністэрствам культуры і ўзгоднена з Дзяржаўным камітэтам па стандартызацыі. Бібліятэкай быў падрыхтаваны праект новай рэдакцыі стандарту. Далей, паводле працэдуры, дакумент быў накіраваны ў бібліятэкі – метадычныя цэнтры рэспубліканскага і абласнога ўзроўняў.
Разумеючы значнасць гэтага стандарту для бібліятэк Беларусі, усе арганізацыі вельмі адказна і скрупулёзна паставіліся да разгляду яго праекта. Інавацыі, прапанаваныя вядучымі метадычнымі цэнтрамі краіны, закранулі тэрмінасістэмы дакумента, працэдуры ўліку асноўных паказчыкаў работы бібліятэк.
Падчас зацікаўленай дыскусіі, удзельнікі нарады аднадушна сышліся ў меркаванні, што рэдакцыя стандарту павінна адлюстроўваць новыя напрамкі дзейнасці, якія ўзніклі і яшчэ з’явяцца ў бібліятэчнай практыцы ў бліжэйшыя дзесяцігоддзі.
Нацыянальная бібліятэка Беларусі выказвае падзяку ўсім бібліятэкам, якія ўзялі ўдзел у абмеркаванні дакумента.
Матэрыял пададзены навукова-даследчым аддзелам бібліятэказнаўства.
