30 мая ў бібліятэцы прайшла экскурсія для выпускнікоў 11-х класаў Пліскай сярэдняй школы імя У.А. Мікуліча.
Школьны апошні званок бывае адзін раз у жыцці. І вельмі прыемна, калі гэтым святам хочуць падзяліцца з табой!
На экскурсіі моладзь змагла даведацца, якія магчымасці бібліятэка прадастаўляе сваім чытачам у якасці інфармацыйнага цэнтра, як працуе сістэма заказу і выдачы літаратуры, пазнаёміліся з архітэктурнымі асаблівасцямі і мастацкім афармленнем будынка.
На выстаўцы “Буквары народаў свету” выпускнікі ўспомнілі свае першыя школьныя гады і паспрабавалі знайсці сярод паўтары тысячы буквароў сваю самую першую кнігу.
Напрыканцы экскурсіі моладзь паднялася на аглядную пляцоўку.
Жадаем юнакам і дзяўчатам поспехаў на жыццёвым шляху! Спадзяёмся, што атрыманыя на экскурсіі звесткі спатрэбяцца, калі яны вернуцца да нас ужо як чытачы і студэнты, а фатаграфіі ў інтэр'ерах Нацыянальнай бібліятэкі зоймуць ганаровае месца ў іх школьных альбомах.
