Сёння адзначае свой 99-ы дзень нараджэння Раіса Пятроўна Сімакова – ветэран працы, удзельніца Вялікай Айчыннай вайны, старшы сяржант медыцынскай службы, блакадніца Ленінграда.
Сорак гадоў Раіса Пятроўна прапрацавала ў філіяле Дзяржаўнай бібліятэкі БССР імя У.І. Леніна, мае больш за сорак грамат за добрасумленную працу, сярод якіх – Грамата Вярхоўнага Савета БССР, граматы Міністэрства культуры БССР і БРК прафсаюзаў работнікаў культуры.
Паважаная Раіса Пятроўна!
Ваша пазітыўнае стаўленне да жыцця, цвёрдасць і сіла духу, цярплівасць і мэтанакіраванасць выклікаюць заслужаную павагу і з’яўляюцца прыкладам для ўсіх, хто ведае Вас і тых, хто працаваў з Вамі.
Несумненнай каштоўнасцю не толькі для сённяшняга, але і для будучых пакаленняў бібліятэкараў з’яўляецца Ваш уклад у развіццё бібліятэчнай справы краіны, фарміраванне нацыянальнай культуры беларускага народа. Гэта атрымала высокую ацэнку дзяржавы, пра што сведчыць мноства ўзнагарод, уручаных Вам.
Калектыў Нацыянальнай бібліятэкі Беларусі шчыра віншуе Вас з Днём нараджэння і жадае моцнага здароўя, радасці, дабрабыту, невычэрпнай энергіі і доўгіх гадоў жыцця. Шчасця, міру і дабра Вам!
Матэрыял прадастаўлены навукова-даследчым аддзелам бiблiятэказнаўства.