25 студзеня ўпершыню ў Беларусі ў Нацыянальнай бібліятэцы адбыўся саміт па сацыяльным прадпрымальніцтве, у цэнтры якога была тэма “Праблемы сацыяльнага прадпрымальніцтва ў Еўропе” (“Social Entrepreneurship – European Challenge”).
Саміт быў арганізаваны ўстановай адукацыі “Прыватны інстытут кіравання і прадпрымальніцтва” сумесна з Нацыянальнай бібліятэкай Беларусі і прыватнай установай адукацыі “Fil. Dr. Jan-U. Sandal Institute” (г. Фінстад’ёрдэт, Каралеўства Нарвегія).
Мерапрыемства прыцягнула ўвагу прадстаўнікоў навукі, адукацыі і сацыяльнай сферы з Беларусі, Украіны і Нарвегіі.
Удзельнікі саміту азнаёміліся з тэорыяй і практыкай сацыяльнага прадпрымальніцтва ў еўрапейскіх краінах і СНД, абмеркавалі вопыт дзейнасці сацыяльных арганізацый, у тым ліку і бібліятэк, у Беларусі, разгледзелі магчымасці ўкаранення інавацыйных тэхналогій у навукова-адукацыйную і сацыяльную сферы.
Супрацоўнік Нацыянальнай бібліятэкі Беларусі Брычкоўскі Вячаслаў Іванавіч выступіў з дакладам “Ініцыятыва адкрытага доступу як інавацыйная мадэль навуковых камунікацый”.
Правядзенне саміту будзе спрыяць умацаванню навуковага патэнцыялу і распаўсюджванню перадавога міжнароднага вопыту ў сферы сацыяльнага прадпрымальніцтва, а таксама павышэнню эфектыўнасці кіравання сацыяльнымі праектамі.
|
|
|
