4 лютага 2008 года а 16-й гадзіне ў галерэі «Лабірынт» Нацыянальнай бібліятэкі Беларусі адбыліся ўрачыстыя мерапрыемствы, прысвечаныя 200-годдзю з дня нараджэння Вінцэнта Дуніна-Марцінкевіча (1807–1884).
У рамках мерапрыемства прайшла прэзентацыя DVD-ROMa «Жыве паміж намі дудар наш...», выдадзенага Нацыянальнай бібліятэкай Беларусі. Электроннае выданне змяшчае бібліяграфічныя спісы, поўныя тэксты выданняў Дуніна-Марцінкевіча, звесткі аб жыццёвым і творчым шляху пісьменніка, каля 100 электронных копій арыгінальных прац беларускіх мастакоў.
Падчас мерапрыемстваў таксама адбылася прэзентацыі 1-га тома 2-томнага выдання прац Вінцэнта Дуніна-Марцінкевіча выдавецтва «Мастацкая літаратура» і «Пінскай шляхты» (на 5-ці мовах) выдавецтва «Хурсик».
Адбылося ўрачыстае адкрыццё кніжнай выстаўкі «Ён першы сеяў зярняты...», на якой было прадстаўлена больш за 100 дакументаў з фондаў НББ, выстаўка маладых мастакоў і паказана пастанова ўрыўка п’есы В. Дуніна-Марцінкевіча "Пінская шляхта" ў выкананні артыстаў тэатра "Дзе-Я" Аляксандра Гусева, Ігара Падлівальчава, Надзеі Анісімавай.
Ва ўрачыстых мерапрыемствах прымуць удзел нашчадкі Вінцэнта Дуніна-Марцінкевіча.