3 сакавіка ў галерэі “Ракурс” (2-гі паверх) адбылося адкрыццё выстаўкі акварэлі і малюнка “Палітра вясны”, прымеркаванай да Дня жанчын.
У цэнтры вясновай палітры – кветкавыя кампазіцыі, увасобленыя ў жывапісе, акварэлі і графіцы, якія нагадалі наведвальнікам пра хуткае абуджэнне прыроды і парадавалі багаццем кветак і колераў.
З цёплымі словамі прывітання выступіла генеральны дырэктар Нацыянальнай бібліятэкі Беларусі Аксана Кніжнікава. Яна нагадала пра добрую традыцыю бібліятэкі штогод ладзіць вясновыя выстаўкі да Дня жанчын і павіншавала прысутных з надыходам вясны.
Сваім экспертным меркаваннем аб шматкаляровай гаме мастацкіх работ падзяліўся намеснік старшыні Беларускага саюза мастакоў па творчай рабоце, мастак-графік Андрэй Басалыга, які нагадаў пры праглядзе экспазіцыі завастрыць увагу на незабыўных пачуццях – цёплых, пяшчотных і заўсёды непаўторных.
Мастацтвазнаўца, арт-крытык, мастак-графік, старшыня секцыі “Верасень” Беларускага саюза мастакоў Марына Эрэнбург і акварэліст, член Беларускага саюза мастакоў і арт-студыі “Аквавір” Наталля Шабуневіч распавялі пра супрацоўніцтва з Нацыянальнай бібліятэкай і сваю плённую працу ў якасці ўдзельнікаў віншавальнага праекта.
Жанравая і тэматычная разнастайнасць прадстаўленых работ “Палітры вясны” нікога не пакіне абыякавым. Гэта і пейзажы, і нацюрморты, і сюжэтныя выявы: неверагодная пяшчотнасць першацветаў Сяргея Пісарэнкі, метафарычнае завяданне старых сланечнікаў Юліі Шамкуць, сімвалічныя абстракцыі гродзенскага мастака і ландшафтнага дызайнера Ягора Коткіна, асабістыя кветкавыя перажыванні і ўспаміны Івана Семілетава, надзвычайная глыбіня колеру палоцен Інгі Карашкевіч, лёгкая празрыстасць веснавой квецені ў работах Юліі Мацура і застылая цішыня пяшчотнай раніцы Вольгі Кузняцовай.
Большасць мастацкіх работ дэманструецца ўпершыню. Удзел у выстаўцы прымаюць як сталыя мастакі, прафесіяналы, імёны якіх шырока вядомыя ў беларускім культурным асяроддзі і за мяжой, так і маладыя яркія зорачкі, што толькі пачынаюць ззяць на небасхіле айчыннага выяўленчага мастацтва.
Выстаўка будзе працаваць да 15 мая 2022 г.
Дата заканчэння працы экспазіцыі можа быць зменена.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 368 37 37.
Матэрыял пададзены аддзелам галерэйна-выставачнай дзейнасці.
Глядзіце таксама рэпартаж тэлеканала «Беларусь 1» пра выстаўку.
