2 сакавіка а 17-й гадзіне ў галерэі “Ракурс” ладзіцца ўрачыстае адкрыццё мастацкай выстаўкі нацюрморта “Ціхае жыццё”, прысвечанай 200-годдзю з дня нараджэння вядомага беларускага мастака Івана Хруцкага.
Нацюрморт – адзін з самых папулярных жанраў. Многія мастакі пачынаюць з яго свой шлях у творчы свет, для некаторых ён становіцца самым любімым, і сваё майстэрства ў гэтым жанры яны ўдасканальваюць усё жыццё.
Непераўзыдзеным майстрам нацюрморта XIX стагоддзя быў Іван Фаміч Хруцкі. Яго эфектныя кампазіцыі, напісаныя з ілюзорнай дакладнасцю, карысталіся вялікай папулярнасцю. У мастака было многа паслядоўнікаў, што, несумненна, пасадзейнічала развіццю жанру нацюрморта.
На выстаўцы будуць прадстаўлены жывапіс, графіка, фота, кераміка, батык. Удзел у ёй возьмуць каля 60 мастакоў з Беларусі, Расіі, Украіны, Сербіі, Арменіі, Вялікабрытаніі, Ірландыі, Латвіі, Польшчы, Францыі.
Выстаўка нацюрморта “Ціхае жыццё” будзе размешчана ў галерэях “Ракурс”, “Лабірынт” і “Атрыум” з 2 сакавіка па 15 красавіка.
