19 снежня 2008 года ў Нацыянальнай бібліятэцы Беларусі адбыліся ўрачыстае адкрыццё выстаўкі мастацкіх мініяцюр іранскага мастака Махмуда Фарсчыена і канцэрт іранскай народнай музыкі, падрыхтаваныя сумесна з Пасольствам Ісламскай Рэспублікі Іран у Рэспубліцы Беларусь.
На выстаўцы было прадстаўлена каля 60 мастацкіх твораў. Тэматыка і жанры сучаснай іранскай мініяцюры адлюстроўваюць нацыянальныя духоўныя і эстэтычныя каштоўнасці, рэлігійную свядомасць іранскага народа. Важнае месца ў тэматычнай разнастайнасці іранскай мініяцюры займаюць класічная персідская паэзія, у якой апяваецца гераічнае мінулае, гістарычныя падзеі; партрэты ў ісфаханскім або каджарскім стылі і вольныя фантазіі на паэтычныя тэмы; вобразы святых і прарокаў; вечна хвалюючыя тэмы Любові, Дабра і Зла, Жыцця і Смерці. У межах мерапрыемства адбыўся канцэрт іранскай народнай музыкі.
Ва ўрачыстай цырымоніі адкрыцця выстаўкі прынялі ўдзел Пасол Ісламскай Рэспублікі Іран у Рэспубліцы Беларусь спадар Сейед Абдала Хасейні, намеснік Главы Місіі, Саветнік па палітычных пытаннях Ісламскай Рэспублікі Іран Масуд Хагані, Саветнік па культуры Ісламскай Рэспублікі Іран Эбрагім Шафеі, а таксама прадстаўнікі іранскай дыяспары ў Рэспубліцы Беларусь.
Экспазіцыя размяшчаецца ў галерэі “Панарама” (22-і паверх). Выстаўку можна будзе наведаць у рэжыме работы аглядавай пляцоўкі. Кошт білета (3.500 беларускіх рублёў) уваходзіць ў кошт наведвання аглядавай пляцоўкі.
Выстаўка будзе працаваць да 23 студзеня 2009 года.
Тэлефон для даведак: 293-27-56, 293-27-67.
Е-mail: pr@nlb.by
 |
 |
 |
 |
 |
 |
 |
 |
 |
