22 чэрвеня ў бібліятэцы адкрылася фотадакументальная выстаўка “Дзеці, якія перамаглі вайну”.
Дзеці і вайна... 22 чэрвеня 1941 года гэтыя, здавалася б, несумяшчальныя паняцці сталі страшнай рэальнасцю для многіх дзяцей. Вайна бязлітасна уварвалася ў іх жыцці, нанёсшы невылечныя раны і пакінуўшы цяжкія ўспаміны, якія немагчыма забыць. Але насуперак усім жахам і галечы, дзеці вучыліся, гулялі, працавалі, змагаліся нароўні з дарослымі і як маглі набліжалі дзень Перамогі.
Прадстаўленыя на выстаўцы ацалелыя фатаграфіі, зробленыя ваеннымі карэспандэнтамі, дазволілі наведвальнікам пранікнуцца атмасферай таго часу і адчуць груз выпрабаванняў, які лёг на плечы дзяцей вайны. Пазбаўленыя ўсіх радасцей свайго ўзросту, яны ўсё ж такі здолелі захаваць у сабе пачуццё прыгожага і прагу да творчасці. Вярнуўшыся да мірнага жыцця, многія з іх сталі пазней выбітнымі дзеячамі мастацтваў. Сярод іх – Муслім Магамаеў, Андрэй Таркоўскі, Марк Захараў, Яўгеній Еўсцігнееў, Галіна Вішнеўская, Іна Макарава і многія іншыя.
У адкрыцці экспазіцыі прынялі ўдзел Алена Далгаполава, першы намеснік дырэктара Нацыянальнай бібліятэкі Беларусі, Ада Калганава, дырэктар Расійскай дзяржаўнай бібліятэкі мастацтваў, і Кацярына Шумянцава, загадчыца аддзела культурных праграм Расійскай дзяржаўнай бібліятэкі мастацтваў.
“Дзеці, якія перамаглі вайну” – не толькі выстаўка-ўспамін, гэта выстаўка-настаўленне дарослым, што дзяцінства павінна быць мірным, радасным і шчаслівым. І ніяк інакш!
Наведаць экспазіцыю можна ў галерэі “Лабірынт” (3-ці паверх) да 13 ліпеня 2017 года.
Дата заканчэння работы выстаўкі можа быць зменена.
Тэлефоны для даведак: (8 017) 266 37 37, 293 28 33, 293 27 56.
Е-mail: pr@nlb.by