10 сакавіка ў галерэі "Панарама" Нацыянальнай бібліятэкі Беларусі ладзілася адкрыццё фотавыстаўкі "Вобразы Амерыкі".
Экспазіцыя ўключае 40 рэпрадукцый найбольш значных твораў амерыканскага мастацтва (жывапіс, скульптура, дэкаратыўна-прыкладное мастацтва, фатаграфія і архітэктура). Адабраныя экспанаты даюць уяўленне пра мастацкую спадчыну Злучаных Штатаў і дазваляюць убачыць унікальны характар, ідэалы і памкненні Амерыкі. Выстаўка "Вобразы Амерыкі" выкарыстоўвае мастацтва як незвычайны інструмент для вывучэння амерыканскай рэчаіснасці – яе сацыяльных, палітычных і гістарычных аспектаў, пераплеценых у разнастайным культурным палатне ЗША.
Праект рэалізаваны дзякуючы сумеснай ініцыятыве аддзела культурных праграм бюро па пытаннях адукацыі і культуры Дзяржаўнага дэпартамента ЗША і фонду National Endowment for the Humanities.
У адкрыцці выстаўкі ўзялі ўдзел дырэктар Нацыянальнай бібліятэкі Беларусі Раман Матульскі, Часовы Павераны ЗША ў Рэспубліцы Беларусь Майкл Скэнлан, загадчык аддзела галерэйна-выставачнай дзейнасці Нацыянальнай бібліятэкі Беларусі Фёдар Ястраб.
Выстаўка будзе доўжыцца да 28 сакавіка ў галерэі "Панарама" (22-гі паверх, закрытая аглядная пляцоўка). Уваход на выстаўку платны і складае кошт наведвання агляднай пляцоўкі.