Выстаўка прымеркавана да 30-годдзя творчай дзейнасці Марыны Бацюковай – беларускай фотамастачкі, члена Беларускага саюза мастакоў і Беларускага грамадскага аб'яднання фатографаў, удзельніцы і куратара шматлікіх выставак і праектаў у Беларусі і за мяжой.

З прывітальным словам на адкрыцці экспазіцыі выступіла генеральны дырэктар Нацыянальнай бібліятэкі Беларусі Аксана Кніжнікава. Прафесійным меркаваннем падзяліліся запрошаныя эксперты – намеснік старшыні Беларускага саюза мастакоў па творчай рабоце, мастак-графік Андрэй Басалыга і мастацтвазнаўца, загадчык аддзела беларускага мастацтва ХХ–ХХІ стст. Нацыянальнага мастацкага музея Рэспублікі Беларусь Кацярына Ізафатава, заснавальніца першай беларускай галерэі – аўтарскай некамерцыйнай канцэптуальнай галерэі “Брама”, мастацтвазнаўца Ларыса Фінкельштэйн.

Цікавыя гісторыі стварэння фотаздымкаў і агляд сваіх работ прэзентавала прыхільніца дакументальнай і канцэптуальнай фатаграфіі і аўтар – Марына Бацюкова. Музычны гурт “Noband”, у склад якога ўваходзіць муж фотамастачкі Аляксандр, павіншаваў прысутных з адкрыццём экспазіцыі і стварыў асаблівую цёплую святочную атмасферу.

Выстаўка знаёміць наведвальнікаў з творчасцю аўтара, прадстаўляе характэрную для яе серыю работ, раскрывае сутнасць шматгадовых творчых пошукаў, іх своеасаблівасць. Асноўныя тэмы даследаванняў – паўсядзённасць, псіхалагічныя партрэты асобы, узаемаадносіны чалавека з навакольным асяроддзем.

“Вопыт прысутнасці” – візуальны дзённік уражанняў ад асабістага знаёмства з краінамі, мастацкія вынаходкі і ўнікальныя вобразы. Здымкі зроблены падчас падарожжаў па Германіі, Ізраілі, Азербайджане, Грузіі, Францыі і Арменіі ў перыяд 2014–2015 гг.

Экспазіцыя нібы складаецца з гадавых пластоў дрэва, якія адлюстроўваюць вопыт падарожжа па культурным асяроддзі, знаёмства з асаблівасцямі горада і людзьмі. Здымкі накладваюцца адзін на адзін, ствараючы кадр, кампазіцыю-паведамленне, багатую адценнямі і дэталямі – мультыэкспазіцыю.

Адзін пласт распавядае пра адну гісторыю горада ці вуліцы, а на фоне яго выступае іншы пласт і іншая гісторыя, уражанне ці нават партрэт. Гэта надае папярэдняму кадру глыбіню, сэнс і каштоўнасць. Выразныя, атмасферныя аўтарскія фотагісторыі перадаюць непаўторную своеасаблівасць краіны больш аб’ёмна, суб’ектыўна і далікатна, чым прамы здымак. Глядач атрымлівае магчымасць пагартаць старонкі творчай памяці мастака, напісаныя святлом і ценем.

Усё гэта стварае ўнікальную аўтарскую прастору ўражанняў, прастору паміж рэальнасцю і асобай, паміж марай і вопытам прысутнасці.

Наведванне экспазіцыі ўваходзіць у кошт наведвання агляднай пляцоўкі.

Выстаўка будзе працаваць да 19 снежня 2021 г.
Дата яе заканчэння можа быць зменена.

Тэлефон для даведак: (8 017) 368 37 37.