16 лютага ў Нацыянальнай бібліятэцы Беларусі адбылося ўрачыстае адкрыццё мастацкай выстаўкі “Віцебск. Арт-50”.
Выстаўка прысвечана 100-годдзю Віцебскага дзяржаўнага універсітэта імя П. Машэрава і 50-годдзю яго мастацка-графічнага факультэта.
Мастацка-графічны факультэт Віцебскага дзяржаўнага універсітэта імя П. Машэрава – адна з галоўных кузняў мастацкіх кадраў. Сярод яе выпускнікоў – вядомыя мастакі і мастацтвазнаўцы, якія ўнеслі значны ўклад у развіццё беларускага мастацтва.
У экспазіцыі прадстаўлена каля 100 дыпломных работ выпускнікоў мастацка-графічнага факультэта пераважна апошніх дваццаці гадоў. Сярод твораў – жывапіс, графіка, акварэль і дэкаратыўна-прыкладное мастацтва.
Пачаў мерапрыемства загадчык аддзела галерэйна-выставачнай дзейнасці Нацыянальнай бібліятэкі Беларусі Ф.А. Ястраб. На вернісажы выступілі кіраўнік культурнага цэнтра нацыянальнай бібліятэкі Беларусі С.І. Шарамецьеў; дэкан мастацка-графічнага факультэта Віцебскага дзяржаўнага універсітэта імя П. Машэрава Д.А. Сянько; загадчык кафедры выяўленчага мастацтва Віцебскага дзяржаўнага ўніверсітэта імя П. Машэрава М.А. Гугнін; мастацтвазнавец і мастак Я.М. Сахута; мастацтвазнавец, прафесар Р.Ф. Шаура; жывапісец В.К. Касцючэнка; загадчык кафедры дызайна інтэр’ераў Інстытута сучасных ведаў імя А.М. Шырокава Л.Я. Дзягілеў.
У галерэйна-выставачным комплексе Нацыянальнай бібліятэкі Беларусі рэгулярна праходзяць вернісажы вядучых мастацкіх устаноў рэспублікі, і выстаўка “Віцебск. Арт-50” стала працягам цыкла мерапрыемстваў такога роду.
Экспазіцыя размяшчаецца ў галерэях “Ракурс” і “Лабірынт” Нацыянальнай бібліятэкі Беларусі да 1 сакавіка 2010 г.
 |
 |
 |
 |
 |
 |
