4 лютага ў Нацыянальнай бібліятэцы Беларусі адбылося адкрыццё экспазіцыі “Венцаносная сям’я. Шлях Любові” ў рамках Года гістарычнай памяці.
Выставачны праект распавядае пра жыццё, служэнне і духоўны шлях апошняга рускага імператара Мікалая II і яго сям’і – імператрыцы Аляксандры, цэсарэвіча Аляксея, вялікіх княжон Вольгі, Таццяны, Марыі і Анастасіі.
У мерапрыемстве ўзялі ўдзел генеральны дырэктар Нацыянальнай бібліятэкі Беларусі Аксана Кніжнікава; мітрапаліт Мінскі і Заслаўскі Веніямін, Патрыяршы Экзарх усяе Беларусі, прадстаяцель Беларускай праваслаўнай царквы, пастаянны член святога сінода РПЦ; кіраўнік Прадстаўніцтва Рассупрацоўніцтва ў Рэспубліцы Беларусь Эдуард Крусткалн; аўтар і куратар праекта, прэс-сакратар епархіяльнага ўпраўлення Магілёўскай епархіі Беларускай праваслаўнай царквы Ілья Сідаровіч.
На выставе прадстаўлена больш за 200 экспанатаў. Шматлікія фотаздымкі і рэпрадукцыі карцін, жыццяпіс сям’і Раманавых, дзённікавыя запісы, дакументы, сведчанні відавочцаў даюць магчымасць пагартаць старонкі жыцця венцаноснай сям’і. На чорна-белых здымках захаваны розныя моманты іх жыцця, пачынаючы з дзіцячых гадоў цэсарэвіча Мікалая і заканчваючы апошнімі днямі. Большасць кадраў вельмі асабістыя, дамашнія і прасякнуты любоўю паміж мужам і жонкай, бацькамі і дзецьмі. Адлюстроўваюць фатаграфіі і шчырую адказнасць у адносінах да сваіх абавязкаў, глыбокае прытрымліванне хрысціянскіх канонаў.
Асноўная ідэя выставы – паказаць высокі прыклад хрысціянскай сям’і, жыццё, напоўненае верай, любоўю і служэннем народу. Прадастаўленыя Расійскім гістарычным таварыствам, фондам “Гісторыя Айчыны” і Дзяржаўным архівам Расійскай Федэрацыі матэрыялы дазваляюць пераасэнсаваць гістарычныя падзеі і сфармаваць разуменне таго, чаму праваслаўная царква далучыла венцаносную сям’ю да ліку святых.
Азнаёміцца з экспазіцыяй можна да 3 красавіка 2022 г.
Дата яе заканчэння можа быць зменена.
Час работы выставы адпавядае рэжыму работы бібліятэкі.
Уваход – па сацыякультурным або чытацкім білеце.
Тэлефон для даведак: (8 017) 368 37 37.
Матэрыял пададзены аддзелам сувязей з грамадскасцю.